Abemo-i Naga yimten telok tenüng amer nisung amokmerenba aitsür

Dimapur, November 16 (TYO) : November 15, 2015 nü osangkaket balala nung NSCN (R) Lieut. Abemo-i Longsa yimer Pankathung Lotha amokmerenba dak sendakba nung Longsa Village Council, Wokha Town Longsa Hoho, Kohima Town Longsa Hoho, Wokha Town Longsa Youth Forum aser Longsa Eloe Ekhung Wokha Town külem senden ka agidang Abemo-i Naga yimten telok tenüng amer züngsem tajung ka amokmerenba inyakyim kukua aitsür, ta LVC Chairman R. Zayio Ezung-i sangdong ka nung metetdaktsü.
Iba senden nung Longsa nunger telok ajaki November 14, 2015 nü ACAUT Wokha Unit aser Lotha tongti teloktemi telemtetba agiba pusema nungittsü bangjemtep, ta LVC chairman-isa ashi.
Pankathung Lotha mesüra par kinünger kar dak danga timtem kar atalokra, iba tebilemtsü khuretji NSCN (R) nungi Abemo-i abentsü aser sobaliba ozüng kübok Longsa Village Council-i tapet temerenshi agütsütsü, ta sangdong nungsa shia lir.
Senden nung adenertemi Civil aser Police administration dang tekaratiba nung aibelener aputsü aser ozüng tapet agi merenshitsü takhangba agütsütsü lemtet.
Ano, Longsa bangdakpurtemi NSCN (R) sorkar dang Abemo mapa nungi anentsütsü takhangba agütsür aser ibaji meinyakra Longsa yimertemi NSCN (R) den tesentaktep mayutsüsa akümtsü, ta LVC chairman-isa sangdong nungsa metetdaktsü.