Mokokchung 2040

Mokokchung town kümer küm 125 ajungba nüngtem nung Mayangnokcha Award Trust (MAT) purtemi anir tang aliba Mokokchung ya küm 25 sülen komaka alitsü ta bilemdanga shisalemsatepba mapang tenzükba ya asenok ajak asoshi kanga nüngdakba tongtibang mapa ka tenzüker asütsü. Ibai asen alitsü ki yanglutsü atema küm 25 sentong yur tenzüker amai lir, anungji pei ki yanglur ama bilema senso ajaki shilem agitsü nüngdaker. Tang nungi tenzüka küm 25 sülen 2040 kümji Mokokchung ya komaka asütsü ta asüngdanga bilemdangba tetezüji Mokokchung town küm 150 tain akümdang kechikomaka kümer alitsü ta bilemdanger asütsü. Iba mangdang mesüra pongmangji tangari ngur yanglutsütsüba masü mesüra tangari pongmangba agi ataloktsüba masü saka asenok dak mangdangji alitsüla aser asenoki pongmangji pongmangtsüla. Aji asü nung dang pongmangji shitak küma asangsang nung ataloktsü. Atangji, asenok kija asoshi masü saka asenok lir külenang asenok chirnurtem alitsü aser ano parnok sülen parnok chinurtem aser semchirsemnurtem liyonga aotsü ta alima mesama tashi lia aotsüba yimti ka yanglutsü atema pongmangtsüba pongmangji mashi nisungi mepongmangtsü mesüra mashimashi aliba agi mepongmangtsü. Iba pongmangjibo, Dr.APJ Abdul Kalami ashi ama, asenok aonung yipten nung mejanger pongmangba pongmang masü saka shisaboluba agi amui meyoki pongmangba pongmang asütsü. Aji oda, joko asenok iba pongmangji pongmangtsü tenzükogo. Iba jagi asenok amui meyoktsü. 2040 küm Mokokchung kechikomaka asütsü ta pongmangba aser bilembaji 2040 küm nungi inyak tenzüktsüba mapa ka masü saka pongmang pongmangtsü tenzükba anogo nungi mapa tenzüktsü. Iba mapa tenzüktsübaji tanü ya lir. Atangji, tanü putu nung Mokokchung town tajungba aser tuluba küma yanglutsü bilemba mulungjang aser kolok nung aliba Mokokchung map-ji tang aliba Mokokchung town  dang nungi kanga agia tuluba lir. 2040 kümbo Mokokchung town-ji tang aliba Mokokchung district ajunga ya asütsü. Tang aliba Mokokchung district ajunga yagi tanü India nung Smart City akümtsü indang jembiba yimti tasazüka madoksatsü. Asenoki bilemdangra, tang aliba Mokokchung town nungi Mokochung district tatembanglenji anülulen külen Tzürangkong aser külen  Tuli asütsü. Aji oda, 2040 kümbo tang aliba Mokokchung town nungi Tuli mesüra Tzürangkong atongtsübaji anünglen yinzü gari nung aser alilen train nung aodang minute 20 shi dang agitsü. Idangjibo alilen gari jajaba lenmang ya tang dang nungi kanga agi tuluba aser tajungba asütsü. Idangjibo, Mokokchung district agi Mokokchung city akümtsü. Aji oda, akhidang ama, 2040 kümbo  Nagaland nung kaketshisatsü tajungtiba angudak Mokokchung asütsü. Kentenmenü, süoshi junga agiba (fashion & Music) aser sayisapong  sayudak aser angazükdakji Mokokchung asütsü. Joko Kohima taodak maka aser Dimapur tatsük, anungji tzü mopong tajung alidak Mokokchung dang bushia nübortemi item mapatemji inyak tenzüktsüsa asenoki anir ajungmesotsüla.  Idangjibo, tetezü 2040 kümjibo, Longleng aser Zunheboto aser Wokha town-tem yabo Mokokchung city nungji kiyong ka amato dang kümadoktsü, anungji asenok o parnok na prongla tajangzük angutsü. Item pongmangji asangsang nung 2040 nung ataloktsü atema tang yongi Aor lanurtemi pei lima nung inyaktsü nüngdakba mapatem indang bilemdanga tenzüktsüla. Tanga lima nungbo sen aika agi ali alitsü saka asen lima nungbo asen li nung inyaktettsü. Joko, karibo mangdang tulu yur senotsü endoka tesem tulu mesemteta school, college aser university tenzüktsüla. Joko, karibo chiyongtsü züsenteta chiyongtsü yanglutsüba mapa angazüka inyak tenzüktsüla. Aji oda, medical azünger Aoer chanutem longjemer ” Mokokchung Hospital & Research Center’ ka lapoktsü bilemdangtsü junger. Itemji nübortemi bilemdanga inyak tenzükdang, Aor yimsüsür aser lenirtemi Mokokchung district peria light aser tzü agütsütsü sentong tenzüktsüla. Joko, Assam nungi Mokokchung ajanga Longleng , Tuensang, Zunheboto aser Wokha tashi train senzütsü asameyangtsüla. Item pongmangji 2040 kümbo ataloker alitsü asoshi item mangdang anguba tenük aser pongmangba temulungjang aser kolok adener yimten yimsüsür nüngdaktsü aser Aor chanu tazünger aser tashitemetetertemi peii angazükba aser metetba tashiji tanga limai (brain drain) bener moi Mokokchung yangertsüba nung amshitsüla. Iba mangdangji Aotsür Aoer shiai pei lima aser pei nübortem meimba shisa nük agi angutsüla aser ngudaktsütsüla.