Islamic State-i Washington amaktsü amokmerenogo

Cairo (Egypt), November 16 (Agencies): Video tasen ka ajanga tanü Islamic State (IS) kiralongrar teloki, Syria nung tayimtsü ajanga parnok amakba nung shilem agiba linüktem-a France nung atalokba ama kasa tia-i aitsü ta amokmerenba den külemi Washington (US)-a amaktsü amokmerenogo.
Hokolbar nü IS-i Paris yimti amakdang tajemba agi nisung 132 tepsetba sülen IS-i amokmerenba video tasenji parnok sangdong agütsüba website nung adoktsüogo.
Syria nung tayimtsü nungi IS amakba nung shilem agiba linüktem dang “crusader campaign” ta ja-a nisung ka sepai sobutsü sobuba den korang ka semer iba osangji sangoktsür, aser iba osang subtitle ji ‘Al Ghareeb the Algerian’ lir.
“Crusader campaign nung shilem agiba linüktem dang onoki tsüngrem tenüng nung ya ashir, tsüngremi dang mulungra nenok atema-a France ama anogo ka arutsü aser, France tiyongtsü Paris amakba ama amaktsü, iba sülen onoki America tiyongtsü Washington amaktsü,” ta nisungba jagi ashi.
Iba video ji shitak asü masü’ar tang tashi nungbo meshiteter, ajisüaka iba video ji Iraq province Salahuddine, Baghdad north tsütsü aliba IS rarartem mapa asütsü südi ta bilemer.
“Al Ghareeb the Algerian” ajangsa maneni Europe amaktsü ta amokmerenogo.
“Ni Europe linüktem dang onok arutsü ta ashir, onoki tapoktsü osettem bener arutsü, tapoktsü nangri aser ola madokba prangpong bener arutsü aser nenoki onok menokdangtettsü, kechiyong tanübo onok taoba mapang dang nungi tashi taitba kümogo,” ta paisa ashi.
France sorkari Paris amakba ya rara jazükba lir ta shia parnoki maneni Syria aser Iraq na nung tayimtsü ajanga Islamic State amaktsü ta sangdongogo.
Deobar nü France nunger raraba tayimtsütem ajanga IS junga amenoka aliba yimti, Raqqa taoba mapang dang nungi tesashiba makogo. Iba operation ji US sepaitem den külemi yaritepa agia liasü.