Tetsür entrepreneur temi NE nung sen invest asütsüla: Jitendra Singh

Guwahati November 17 (Agencies): Union minister Jitendra Singh-i, linük nung aliba tetsür entrepreneur temi north-east India nung sen enoka (invest) iba tesem industry aika aliba tesem kümdaktsütsü nüngdaker, ta Mongulbarnü ayongzüka liasü.

“Tetsürtemi amuoka inyakba nung lokti aser nüburtem ajak amsemer. Parnoki tekaden süa inyakba nung putu asem inyakim amsemer—tsürabur aser anük apang, kinungbo aser adianu den lar chirnurtem,” ta ministry of development of north eastern region (DoNER) nung ketdangser Singh-i ashi.

Federation of Indian Chambers of Commerce & Industry’s women’s wing-i tentetba ‘Swayam’ inyakim tenüng sanga ashidang, Singh-i, “Iba inyakim ya Delhi aser tesem kar nungbo tenzükogo aser iba ya ajanga telemsa balala nung tetsürtemi pei sasa mapa inyakteta ajangzükba tsütsü kanga takok ngua odar,” ta ashi.

Paisa, Swayam inyakim ajanga north-east tesem tenük lapoktsütsü, ta ashi.

Union Minister, Singh-i, “North-east tesem nung anema aliyim tsütsü nijai shilem agiba ajanga mapa tulu inyaktettsü,” ta ashi.

Pai, tetsür entrepreneur tem ajanga north-east nunga anema aliyim tsütsü maparen aika tenzükogo, ta shisem.