CTC aser SBC nung “Christianity vs Yoga” shisatokden agi

Dimapur, November 17 (TYO) : Clark Theological College nung November 13 aser Servanthood Bible College nung November 14, 2015 nü “Christianity vs Yoga” onük nung shisatokden sentong agi. Iba sentong nung Rev. Hernanta Kafle, Director, Station 4 Nations, Shillong tongti O jembir liasü.

Pa ya Brahmin kibong nungi soa yintet aser Banaras University nung Masters in Hindu mythology azüng, saka pa küm 20 asüdang Khristan yimsü agizük aser Doulos Bible Institute, Shillong nung Theology azüng.

Kafle-i yoga tetezü aser inyakyim rasa metetdaktsüdang, “iba ya Hindu nunger tamangba yimsü nung tekümtet angutsü asoshi inyaker. Anungji iba ya exercise kija masü saka Hindu nunger tamangba yimsü inyakyim koba dang Moksa (nüjiso) ta ajar iba den sendaktepba lir” ta ashi.

Pa küm ter tashi par tesayur kübok yoga benshiba nung tesünep tejangja manguba indang kuli asü aser ano pai azüngba nungi yoga indang sayuren koba Hindu tsüngrem den tesendaktep lir, iba indangji telok dang lemsatep. Saka tanu Naga nunger Khristan temi yoga tetezu mejangjai benshir ta pai sa ashi.

“Yoga-ji Hindu yimsü den sendaktepba lira kechiba Khristantemi aji benshir” ta Kafle-isa asüngdang.

Tatemsa pai Naga nunger dang yoga tesayuba indang jungjunga meteta alitsü ayongzük aser iba yagi pei tamang tanga tamangba yimsü den hai-haura makatsü asoshi ajungshi.