Kwi atema renemtsü ?

Benjongbo ayonga ayu saka nisung kwi arutsüar memetet chiyongtsü  renemtsübaji shisabolutsüka lir. Iba tebilemtsüji, talisa, tang ama kiyir benjong ayongzüka akaba mapang ajurur. Asenok Naga nunger, ano balaka asenok Aortem ya lokti sapuba nübortem lir, anungji longsulongben ya kanga aginür. Iba jagi benjongbentsü ayongzüka akaba mapang pei adianu aser kinungertem dang masü saka medemer, yimtsür yimer aser metettepa alir tembartem ajak jungjunga bilemdanga kata mezüdoki jaoka külemi pelateptsü meranger. Iba sobalibaji kanga junger. Tangar tsümar mesüra temesüng nisungtemibo peii ayongzükba benjong nung adentsü asoshi kanga anasatepa aliba pei kinunger adianu den medemer tajungtem dang kar jaoker, anungji parnok atemabo benjongi kwika arutsü ta ratamataa shisabolua bilemtsü nüngdak madoker. Iba jagi tsümar kiyir benjongi jaokba shidi ‘Invitation card’ sen aika jenjang kanga junga renemer agütsür aser tejaoker ajak arua adener. Asenokbo yamaji masü, kechiyong asenokibo meteta aliba nisung tebilemtetba tashibo ajak jaokner. Iba amaji ka meinyakra mejaokertemia kanga jashir. Iba jagi asenok benjong nung adentsü asoshi nisung aika  jaoktsüsa akümer.Atangji, benjong asünungji aika arua pelatepa amongtsübaji jangratemtsüka, ajisüaka aika jaokba rongnungji kwika adentsüar mejangjatetter, kechiyong asenok sobaliba nung tejaoker dang arutsü mesüra marutettsü ta ashiba yimya tenteta maka. Yimya agi tajaokba shidi nung RSVP ta tezü külen tajoker tenüng den tongtepratepdak tesem aser phone number agüja agutsü. Iba tetezüji na tentettsü asü metentettsüar imlibilema metetdakjangma ta ashiba o ka lir. Ashiko, RSVP ta asübaji tangar oshi nung aser ajia oren ajunga masünungji aikatibo mangatettsüa akok.Ano, shidi ajak nungbo aji enoksema malitsüa akok.  Ajisüaka, asenokbo tangatettertemia jelia telangzüba magütsür, kechiyong aji asenok sobaliba dak maket anungji yimya mesüba. Ibayongji, kiyir benjong nung balaka nisung kwi asoshi chiyongtsü renemtsü ta asüba maparen nung kanga shisaboluteper. Aji oda, aikati meperitsüsa renemba dang nungibo perir anüngtsüsa renemer , anungji aika anünger aser takoksa angur. Iba amaji mesüi asenoka tangar amato kwi atema chiyongtsü renemtsüar, ajibo metettsüsa tajaokertemi kibur dang jelia arutettsü asü marutettsüar jelia ashitsüba sobaliba tenzük nung junger ta bilemer. Iba sobalibaji tenzüktsü atema asenokbo tejaokba shidi ( Invitation Card) ya asen oshi nung zülutsüla aser idakji RSVP ta masü saka tentettsü asü metentettsüar telangzüba aginür ta mepishia zülutsüla. Asen oshi agi zülur asünungji ajibo ajaki kanga süoki ia bilema azüngtsü aser telangzüba agütsütsü. Anungji, benjong kibur-a kecha tebilemtsü melii chiyongtsü renemtsü aser mendena alatsü. Tanü putu nung asenoki mebilemdangi inyakba mapa kaji English kenyongi mashi aser mangatetter ka nem English agi ozü kiyir benjongi arung ta zülur agütsür. Shitakba nungbo, ibaji mezüngmeshirang ka mesük Atangji, ibaji tangar den asüngdangtepa temetetbo metettsü saka yangji kanga süoki ia agizükba ka mali. Iba amaji asenoki jungjunga mebilemdangi inyakba mapatem kar lir. Aji oda, mapa boluyonga asenokbo tejaokba shidi ya Aor nembo Ao agi zülur agütsüra, iba jagi asenok oshia renloktsü aser asen kin a mera akettsü aser angatetter asünungji jelia nüngdak osangtem marendaki agiteptettsü. Atangji, kiyir benjong ayongzüka alitsübaji khuret tulu, senotsü aika aotsü. Ajisüaka, takoker atemabo kecha masü. Ibaji atema meranga inyaktsüla. Ajisüaka, kiyir benjongi arurtemi senotsü bener arutsütsü imlaa kiyir benjong tuluka mayongzüktsüla mesüra kwi arutsüar memetet ser mashimashi mawazütsüla. Item ajakji meteta kodang asenoki inyakdir, asenok loktiliba aser sobalibaji bentetbenteta jangratema asütsü aser asen rongsen aser mapanga amajok nung melalutsü.