Kr. Chentisangla-i Mayangnokcha Award agizük

Mayangnokcha Award agizüker den tongti tesemdanger Education Minister Yitachu aser MAT züngsempur külemi tangokba noksa nung angur. Mokokchung, Nov 17, 2015.

Mokokchung, Nov 17 (TYO): 22 buba ‘Mayangnokcha Award for academic excellence’ sentong yangi Mokokchung town hall nung tanü Mongolbar nü meraketa agiogo aser taküm iba konang tulu aketba senpetji G. Rio School Kohima nungi Kr. Chentisangla Longkumer-i agizük. La nem MAT-i senpet sen den nüngo aser kuli kaket tajung ka agütsüogo.
Iba den ano MAT-NE Sun Award English Subject topper senpetji Trinity School Kohima nungi Kesino Thorie-i angu aser iba senpetji North East Sun Magazine, New Delhi-i sponsor asü. MAT-Rockdale Award Ao subject topper (MIL) senpet Clark Memorial Hr. Sec. School Impur nungi Imsüoneni angu aser iba senpetji Rockdale Club Mokokchungi sponsor asü.
Ano Youth Resources & Sports Department Nagaland-i sponsor asüba MAT-YRSD Award Social Sciences subject topper senpetji Esther N Odyuo-i angu. Aser ano, Tir Yimyimi sponsor asüba MAT-Tir Yimyim Award Science subject topper senpet Mezhür Hr. Sec. School Kohima nungi Ponthungo Odyuoi agizük. Mathematics subject nung topper MAT-EFoM Award-ji Chentisangla Longkumerisa agizük aser iba senpetji Education Forum of Mokokchungi sponsor asü.
Tanü iba sentong nung tongti tesemdanger Nagaland Education & SCERT Minister Yitachu-i jembidang, tanü Naga nunger lokti nung tesasatsü kaji sorkar mapa dak dang rangloker azünger ta metetdaktsü.
Nagaland ya azüng zülu metetba “literacy rate” nungbo jenjang tajung lir saka asenok libaliroji iba amaji masü, anungji, “asen tekolok shisatsü, bilemdangba tashi aser tangatetba melenshitsü asoshi chichiba education nüngdaker aser education ajanga dang itemji melenshitettsü” ta paisa ashi.
Paisa Mayangnokcha Award Trust (MAT) pur tenüng sanga ashidang, “iba sentong ya kin kidong kecha mebendangi inyakba maparen ka lir aser ibai Naga nunger telungjem dangi aniba maparen ka lir” ta metetdaktsü.
“Education ya kodanga tatembang matongba maparen ka lir, yamaji telungjemjia kodanga tatembang matonger, anungji, telungjem aser chichiba education-ji kanga tenüngdaktsü aser aji tang Naga nunger rongdak nüngdakba lir” ta paisa ayongzük. “Telungjem alinung dang tarutsü lanu putuji kümzüka yutettsü” ta paisa shisem.
Mayangnokcha Award ya Nagaland nung alir Naga nunger (Nagas of Nagaland) nem agütsür aser ibai Nagaland Board of School Education (NBSE)-i achayanga agiba class 10 (HSLC) tatidang nung tangar dang alakteta takok angur nemsa Mayangnokcha Award Trust (MAT) teloki achayanga agütsür.
Tanü iba sentong nung 1999 küm Mayangnokcha Award agizüksang Teisovi Gerard Meyase-ia mapang tatsüka agia tesentepertem ayongzük.