Kejriwal’er sorkari Delhi nung ‘Aam Aadmi’ canteen lapoktsü

New Delhi, July 16 (Agencies): Delhi nung AAP sorkari ‘Aam Aadmi’ canteen lapoktsü, ta Brihostibar nü osang ka ajanga ashi.

Item canteen nung nüburtemi chi auso ka nung sen 5-10 yong angutsü.

Delhi Dialogue Commission (DDC)-i benokbaji tanü Chief Minister Arvind Kejriwal-i agizükogo, ta DDC tatong Mendenbuba Ashish Khetan-i osangbenertem dang ashi.

Chiyungtsütemji sen dalang yong angutsü aser sen timtiba agi senpak 10 asütsü, ta Khetan-i ashi.

Tang item ama canteen lapoka aliba state Tamil Nadu aser Odisha na nung survey ka agiba sülen iba maparen asoshi sentong yangludar, ta pai ashi.

“Taruba ita ka mesüra ana nung item canteen lapoktsü onok tebilemba lir. Mezüngbubaren nung onoki hospital, industrial area, college aser shishilembaba tesemtem nung aam aadmi canten lapoktsü,” ta Khetan-isa ashi.

Item canteen ji food & supplies department-i achayangtsü.

Tamil Nadu nunga item ama canteen lapoka lir aser canteen nungji sen kanga dalang yong chiyungtsü angur.

Tamil Nadu nung canteen tem dangji Amma Unavagam ta ajar, koba tetezü ‘Tetsü hotel’ aser itemji state sorkari achayanger.

Item canteen nung idlis senpak ka yong angur, sambar sen 5 yong aser curd rice senpak 3 yong angur.

Tamasabo item canteen ji Chennai nung lapok aser tesülen state nung Coimbatore, Madurai, Trichy, Tirunelvelli, Tuticorin, Salem, Erode, Vellore aser Tirupur jilatem nung lapokyonga ao.

Tamil Nadu Chief Minister Jayalalithaa dang ‘Aama’ ta ajar aser sen sensaker nem dalang yong chiyungtsü agütsüba canteen ya lai tama apiteta tenzüka liasü.

Jayalalithaa dang party züngsemtem aser la sapurtemi ‘Amma’ ta ajar.