Dr. Nicky-i “Animal on the Cloud” maparen tenzüktsü

Dimapur, November 18 (TYO) : November 18, 2015 nü Forest Environment & Wildlife Minister, Dr. Niekiesalie Nicky Kire-i Nagaland Zoological Park, Rangapahar nung “Animal on the Cloud” Awareness & adoption campaign den website tenzüktsüogo.
Sorkari shiruru adoption indang mapa nung yariteptsü aser Naga nungeri Molulem ozü wazüka yutetra, tanga shirurutema wazüka yutettsü, ta tanü Dr. Nicky-i o jembidang ahsashi.
Yimtsüngtem tsüngda amalitep alitsüsa aser iba jagi shirurutem kümzüka yutettsü, ta paisa shisem.
Nagaland Zoological Park dak sendakba onük jembidang, Dr Nicky-i ashiba agi, nendaka inyakertemi iba Zoo anepalutsüla.
“Shiruru meimertemi iba zoo anepalutsüla. Zoo nung timtem kar adokra ibaji department khuret asütsü” ta paisa metetdaktsü.
Dr. Nicky-isa ashiba agi, Forest Department-i Nagaland nung MLA ajak den shiruru ka ka adopt asütsü atema tongteprateptsü.
Tanü sentong nung Principal Secretary, Forest & Environment N.N. Zhasa-i tesentepertem dang shiruru aser süngdonglidong wazüka ayutsü tayongzükba agütsü.
Officer in charge, Nagaland Zoological Park Obed Bohavi Swu-i zoological park indang osang metetdaktsü aser pai ashiba agi, Nagaland nung alirtemi teyari agütsüba ajanga NZP alizüng tasen ka tongogo ta paisa shisem.
Tanü sentong agiba nüngtem nung PCCF & FF, M. Lokeswara Rao-i pa taküm ali tashi shiruru ka adopt asütsü aser ibaji atema pai kümshi sen 10,000 tenla agütsütsü ta nangzük.
Sentong nung mendenji Castle Group nungi Vincent Belho liasü, Principal OTS, Dr. Wati Aier-i temoatsü meshia sarasadem aser campaign ambassador Tali Angh-i ken ka aten.
Iba sentong nungsa Parliamentary Secretary Housing, Er. Levi Rengma, taoba Parliamentary Secretary Azheto Sema, DC Kesonyu Yhome-i anir District Administration, forest department nungi ketdangsertem aser school tanurtemi shilem agi.
Iba sentong ya Fingerprint aser Castle group nati Department of Environment Forest & climate change den yaritepa ayongzüker aser Nagaland Post, The Morung Express, Eastern Mirror, Rampezine, Indihut, The Naga Blog, Nagaspear aser Diampur Blog nungeri teyari agüja nungiter.