IGAR (N) telok 21 buba Classic Cup final-i iogo

Dimapur, November 18 (Agencies): Head Quarter Inspector General Assam Rifles (IGAR(N)) teloki goal 1-0 agi Head Hunter, Naga Regiment telok madak tanabuba semifinal asaya koka tang tasasyak 21 buba Classic Cup asayamong final nung shilem agitsü jenjang tanü Bodbar nü nguogo.
Tanü asaya tenzüker minute 17 buba nung K. Chizho-i par IGAR(N) telok asoshi takokba goal agütsü.
Tanü asaya nung Hunter asayartem rong nung pass junga magütsütetba den külemi, asayartemi peisasa goal agüja kija konang arishiba ajanga par teloki tanü tamakok angu.
Tanü takok anguba telok, IGAR(N)-i defending champions, Barak Football Club, Peren den tan November ita 20 nikongtsütsü 1:30 ako nungi tenzüka final asayatsü.
Asayamong final asaya nung Nagaland Forest, Environment & Climate Change Minister, Dr. Neikiesalie Nicky Kire tongti tesemdanger alitsü.
Ano külen, tan asayamong den sentaktepa, Kohima Press Club aser Classic Cup na tsüngda Challenger Cup asaya asüng, Brehostibar nikongtsütsü 2:00 ako nungi tenzüka asayatsü ayonga lir.