Yimjung bushitsüla

Tang Delhi nung India sorkar den NSCN-IM teloki Naga yimten tebilemtsü ken o kokteta tatembang küma latettsü asoshi jembiba ya osangbo tajung saka teratatsüka lir, kechiyong komaka nung iba ken o jembiba ya atemtsüar shingaia memetet. Ano, külen India sorkari NSCN-K telokbo kiralongrar telok asütsü ta metetdaktsüba osangjibo shisabolutsüka lir. Item tensa tia ajak ya Naga nunger ajak lendongi aitsüsa tapoktsü bomb renemba mapa-ang ka mesük. Aji oda, mekümdangra Naga nunger ajak timtem takoksa ajurutsüsa mapang tamajung ka agi menepa arutsü. Iba anogo tamajungji marudaktsüi nokdangtsüsa tang Naga nungertemi yimjung bushitsü nüngdaker. Naga nunger asoshi yimjung nüngdakba tesemji NSCN telok ajak aser NNC telok ajak tangatettep nung alitsüsa ken o terenemba ka alitsüla. Aji oda, parnok ajak külemi ajurutepa yimjung nung yimten telatetba ka agitsü atema jembitsüsa, tamalen FNR teloki inyakba ama ano maneni yimjung bushiba mapa inyaktsüla. Aji oda, asenok asoshi yimjung nüngdakba tesemtem rongnung ano tongtibang kaji NSCN-K telok o India sorkar na tsüngda yimjung yanglutsütsüba mapa ya asütsü. Naga nunger yimjung yanglurtem aika lir, anungji parnokji arogo tsütsü süshia, yimten tsütsü süshia mesüra loktiliba tsütsü süshia Naga nunger asoshi yimjung bushitsüba mapaji manentsüla. Aji oda, 1997 küm NSCN-IM o India sorkar na tsüngda yimjung yanglutet süra aser ano iba sülen NSCN-K o India sorkar na tsüngdaa yimjung yanglutet süra, tanüa kasa telok ana tsüngdaji tanaben yimjung yanglushitsübaji tamakoktsü masütsü. Naga lima ama yimten tebilemtsü alidak yimjung malibaji ajak atema takoksa lir. Iba jagi sorkar tajangzük mangutsü, sepaitem animesüngzüktettsü aser telong purtema kecha tajangzük mangutsü. Aji oda, Naga nunger yimten nüchiso asoshi rarartemibo ibaji aiben ajangshir asütsü. Iba ama mapang tajung aser tamajung ajak ajangshirtemi tang ama ya Naga nunger tongtibang lokti tentettem nung tanishirtem ajak jaoker shisalemsateptsübaji kanga rongdak nüngdak kümogo. NSCN-IM lenirtemi ashiba ama, tang ama India sorkari lenchii arua Naga yimten tebilemtsü akoktsü merangba mapa aser mapang ya takok mengui süidaktsü nungbo, Naga nunger yimten tebilemtsü ken lemtep tenzüktsübajia ano küm aika agitsü, anungji Naga nunger asoshi yimten tebilemtsü ya tatembang küma latettsübaji tang mapang tajung lir. Ibaji ano tali tajungba nung angateta, NSCN-IM telokia tangar Naga nunger yimten nüchiso bushir teloktem den külemser India den telemtetba agitsü nüngdakba nungji angateta nokdakra, iba jagi teti atema Naga nunger asoshi tagitsü adoktsü. Item ajakji mapa küma inyaker Naga lima nung teti yimjung alitsüsa inyaktsübaji tamasa kecha telemtetba magidang NSCN-K o India sorkar na tsüngda yimjung alitsüla. Tanü lima nung yimten nung süshia, tanga maparen nung süshia tashiyim agi masü saka yimjung nung tangatetba agi jembiba ajanga dang yimten tebilemtsü akoktsü. Iba tangatetba nung NSCN-K telokia India den yimjung nung ken o benoka jembitsübaji mulungtsüla. Ajaki angatettsüba kaji Naga yimten temeten asoshi nokdakba maparen nung süaka tashiyim agi inyakba nungbo Naga nübortemi shilem magitettsü, kechiyong tanü lima ya iba ama inyaktsüba lima kaji masü. Aji oda, o agidang mapa küma inyaker asünungji India den maneni Naga yimten ken o benoka jembira, India-ia tali tajungba angatettsü . Iba tangatetba nung Naga nunger yimten aser lokti lenirtemi Naga lima asoshi maneni longjemer yimjung bushira, yimjungji talang nung masü anameta angutsü.