Solution masü telungjem tama bushidi: Nüklutoshi

Mokokchung, Nov 19 (TYO): Naga yimten tebilemtsü tatem küma latettsü asoshi ‘unity for solution’ yimyim ka bener oa pei alidak sangoktsüba den mapa küma inyaktsüla ta tanü Brihostibarnü Highway, Mechanical & Election Minister Wb. Nüklutoshii Nagaland GB Federation pur lokti senden ka yangi Mokokchung town hall nung jembidang metetdaktsüogo.
1951 küm Naga nunger meyongnem (plebiscite) agir külen, 1952 küm NNC pangzüng nung ajemdaker Longidang nung GB mungdang alidang GB-tem ajak anentsü lemtet. Iba mapang GB-tem taküm aika lalu aser tepuokdaka ayu, yamaji timtem jenti agia Naga yimten atema bendanga agütsüba indang otsü kar paisa ashi.
Taoba mapang British aser India nungeri yimsü asüdang azüng-zülu tulu meliaka GB-temi maparen balala takok ngua inyakogo, tanübo GB-tem azüng-zülu meteter dang lir, ajangla, “Naga nunger atema tanü nenoki kechi tashi inyaker?” ta, paisa asüngdanga ashi. “Repranga dang atatsü asü, langkabo inyaktsü” ta, paisa ashi.
“Tang Naga nungeri yimjung aser küm aika yimten tebilemtsü aliba tatem küma teti atema telatetba aginer, aji oda, aginer saka asenok melungjemteter”, ta pai ashi. Anungji, “GB-temi Naga nunger paksar alibaji ka küma lungjemdaktsütsü asoshi inyaktsüla” ta paisa ayongzük. “Naga yimten latettsüba maparen nungji Naga nunger shiaji kanga tongtibang lir, anungji, asenok tama lungjemtsüla” ta paisa shisem.
India sorkari ‘sovereignty’ & ‘integration’ anajibo makoktsü ta o lepdang agüjadokogo. Iba dak alaka “Naga nunger arok taginübatemji obang ka ser sabangi bener arutsüla” ta India sorkari Naga yimten latettsüba dak sentakba indang ashiba ken o ka paisa lemsatep.
“India sorkar o NSCN (IM) na tsüngda peace accord sign sütepba ya yimjung süngkhüm lapokba ama ka dang lir, anungji India sorkar dang asenok obang ka ser iba amai Naga nunger liner ta ashitsüla aser solution tama masü telungjem tama bushidi” ta paisa ashi. ‘Naga nungeri lenmang tatsü dang bushir, iba jagi taoba mapang nunga aiben tatem nung tamakok anguba lir’ ta paisa tekümdangtsü olen ka shisem.
“Naga nunger telungpur tsüngda lungjemtsübaji tanga telok kechaia makoktsü saka ibai civil societies-i dang lungjemdaktsütettsü. Taoba mapang Naga nunger ka kümer meyongnem (plebiscite) agiba amato tanüa lungjemtsüla” ta paisa ayongzük.
“Naga nunger melungjemba ajanga Naga yimten tebilemtsü ya tasakba küma aor” ta R.N Ravi-i ashiba o ka paisa lemsatep. Anungji, “solution atemaji mezüngbuba asenok lungjemdi” ta, paisa shisem.
Nagaland ya Christian lima ka lir saka asenoki chichiba Christian mesüka malir, anungji, “anemsü medeni temeim lidi, kechiyong chichiba temeim agi dang Naga nunger ka küma lungjemtettsü” ta, paisa ayongzüka jembi.
Iba mungdang amungba ajanga asenoki Naga nunger lungjemtsü asoshi “unity for solution” yimyim bener pei alidak sangokja aser ibaji mapa küma inyaktsü asoshi Nuklutoshi-isa metetdaktsü.
“Tang koba India sorkari Naga nunger nem kishi lapoktsür, iba maoangkaji agitsüla aser lanu asensor atema tarutsü tia yanglutsüdi. Aji ta mesüra tarutsü lanurtem tia tepseterji asenok asütsü” ta paisa ashi.
Tanü sentong nung tetushi tesemdanger Parl. Secretary for Horticulture, DB & GB Kejong Chang menur atong, saka paia mapang tatsüka agia tesentepertem ayongzüka liasü. Sentong nung Watsü Mungdangi sobaliba ken ajanga tesentepertem saksalemdaktsü.