Asenok Khristan purtem

Nagaland nung Naga Khristantemi osangtajung sayutsüngiba o loktiliba majung akümba na tetsüngda talangka lir, iba jagi  tanü asenok tetsübu aser mulungmelemtet agi sünga lir ta yakanü Dimapur nung Arogo teinyaktsü indang Arogo nung meinyakertemi bilemba indang jembidang, Nagaland Baptist Church Council (NBCC) Peace Committee nung züngsem aser loktiliba ajungtsü indang jembir, Wb.Niketu Iralui metetdaktsübaji Nagaland arogo lokti osang asütsü. Aji oda, paisa  tanü arogo nung lenirtem den shisabolu ka lemsatepdang, tanü Naga Khristan-temi lokti tebilemtsütem ya koka meinyaktetra, ashiko tarutsü putu nungbo Naga nunger lanurtemi Khristan yimsü ya sendoktsüa akok ta ashibaji asenok ajaki kanga süoki ia bilemtsüba mapa ka asütsü. Asenok Khristan-bo Khristan, saka asen taküm libaliro nung mazüok aser ochimashi, anungji asenok chirnurtemibo Khristan mesünütsü. Asenok Khristan-bo Khristan saka mapa meinyaki anguba rongsen agi kibong mesür, anungji tanurtemibo mapa meinyakyonga Tsüngremi moatsütsü ta bilemtsü. Asenok Khristan-bo Khristan saka tashiyim mapa inyaka asenok taküm alir. Aji oda, Khristan-temi sayuba school ajak tamajung kümogo aser Khristan-tem inyakba mozü kidang teyari shitak mangur. Iba amaji Khristan-tem inyakba office-tem nung ochimashi mapa toktepa inyakteper ama inyaker. Aji oda, Khristan-tem inyakba office nungang ochimashiba mapa tuluba inyakra, iba jagi asen chirnutemibo Khristan mekümnütsü. Aji oda, tanü Khristan purtemi senotsü shitak mamshiba ajanga asen lima merenloktetba tetezüji Khristan asüba ya majunga ta tangar matsüngdang mapa agi kuli süa sayuba den kasa lir. Asenok Naga Khristan-tem aser ano talisa Aor Khristan-tem asoshi Tsüngrem aser nisung tsüngdang aibelena inyakba mapa tulutibaji ibaji asütsü. Asenok Khristan süra asenok alidak yimten aser loktiliba nung ochimashi inyakba mapatem ya anendaktsütettsüla aser nübortem timtema aliba tia nungi anitettsüla. Iba amajika asenoki meinyaktetra asenoki Khrista maksütsür asütsü. Tanü asenok Khristan-temi auyali taidok meshili aser auyali meshitetter amshili ta asüba sobaliba ya jungjunga bilemdangra Tsüngrem den asayamenüba mapa ka asütsü. Asenok asoshi dang masü saka tarutsü putu asoshi dena lendongji aji ka asütsü. Aji oda, arogo nung toklang tenzükertemi danga aser deacon-temi danga pei mapa nung ochishia Tsüngremi agizüktettsüsa inyaktet nungbo Nagaland ya kanga junga renloka otettsü. Tanübo asenoki ochimashi  bendenba sen agi ki yanglur sarasadema meshitetter, auyaba aser sensakertem bang nungi rakzükba sen agi gari alir aser sarasadema meshitetter, iba amaji makamaitertem meyong parnoki memetet agizüka agiba agi takar ishika akümer saka sensakerbo aika akümer. Ibai Khristantem sobaliba masü, anungji Khristan-temi ochimashi mapa inyakba ya asen sobaliba ka ama mekümdaktsütsüla. Khristan sobaliba nungbo inyaker külenang chiyongtsü aser meinyakra mechiyongtsü. Anungji, mapa meinyaki rongsen  bendenbaji Khristan sobaliba anema lir. Aji oda, inyaker chiyongba aser inyaker takar akümba aser pei akaba nungi temeim mapa inyakbatemjiang Khristan sobaliba asütsü. Item Khristan sobalibaji asenoki shitak mapa küma benshiteta asen chirnurtem dang sayutetra, asenok tenük agi ngua asen lima azükaruba asenoki angutsü aser idangji asen chirnurtem Tsüngrem taochi manung tetsübu tarendak mali pelatepa aliba putu tasen ka asenokia ajangshitsü. Tang yabo asenok Khristan masü, limapurtem danga tamajungba. Anogo shia lenmang dang ngutetra auyatsü atartem lir. Aji oda, asenoki aonung piyong auyatsü bilemer aser anepdang nungi aonung tashi auyar. Iba auyaba sen nungi Tsüngrem nem tenla agütsür aser asen chirnurtem nüngdaka peritsür. Aji oda, arogo nung tenzükertemsa ochimashiba aser metenzükertemang ochimashiba ta arogo nungertem rongnung ochimashi mapa toktepa inyakba sobaliba ya manentetra, shitakba taruba putu nungbo asen lima nung arogo malitsü !