2040 MAT ajanga Mokokchung penzüba

~ I. Zulu Pongen

MAT ajanga 2040 Mokokchung penzüba indang nübor dang lenmang kar sayuogo. Alima terenlok indang merükmejuba indang, ano 16 November Ao milen adok nunga nisung karia pei tebilemba lemsatepogo, item ajakji shitak. MAT ya education tsütsülen nungi, süaka lenmang pezü sülen nungi terenlok Mokokchung Mangdang, nükla dak rangloker ashir ta angatet nungji nia kü tebilemba ka shidanger/lemsateper.

Tamasa education line nung yamai inyaktet nung ajungtsü ta shidanger. School tsütsü reprangdngra English School taluposa Nagaland ajanga nung kinük kisang sünga lapoker tajungtiba toktepa aor asünungji asen Mkg nunga aser yimtsüng tashi Private School lapoker züngdagi, anungji tanübo education asoshi kangarabo shisa mebulur. Tazünger tematiba tashi oda department ajak nung doctorate degree tashi line ajak nung ngua odagi. Saka tebilemtsü kaji, sorkari lapokba school primary/Middle school nungbo centre aser state tashi ajunga agi rongsen jenti indoka anepaluaka sorkar schoolbo tajungba madoker, ya kechi tai (?) Tanü putu nungbo primary teacher- temji graduate teimba, English mejembiteterbo ka ana dak alaka malitsü südi ta bilemer. Aser graduate teacher temji ano private school nung küm 5-10 tashi experience sür takotet tesa tang ta angazüker, süra kechiba English agi mesayuteter, ya tanga masü saka English mangazükdaktsüba agi tangari angatetba ama mangateter, tangari azüngba memeneper, ano managing board-ia tashih magütsür südi ta bilemer. Anungji ya shitak ta bilemra 2040 nungbo English School 50% bo menepa atutsüsa ase Mkg District School tem ya asentenshia yanglushidi ta shidanger.

Tanabuba nung Mkg Hospital ya machine tajung nüngdaker aser itemji amshitettsüsa technician expert nungdaker, aji tasa mabensayonga soruchiokdak tesemlen memerük aser metsü-meshidak maka ya tamakok ulura. Tejaklenibo onur saka nisung alidak latrine, urine mali, ward nung amonger asoshi shiranger aser tanükertem atema sen agi scü a kozütsü tang süaka tajung teperi yanglutsütsüla, tamasa ya yanglutsüdi arungma.

Tasembuba nung Mkg Town tiyong police point nung over bridge yanglutor aliba ya kechiba anener? Tenokdangba kar ali asü, teyangluri mejungi tenzükba agi asü, mesüra sanction magütsüba agi anener? Ya kanga tongtibang. Alima tila saka nütsüng aser gari tali anungji tangar lima ama asenoka ibaibo yanglu nung ajungtsü. Ano MMC administration order ajanga nallah tulu tila ajak nung jana melaa meraksatsüba osettem ya meindoktsü ozüng den mapangshia reprangshia aibelener merenshitsüsa ward yimden nem tashi agütsütsüla. Ano ki tsüngda lenmang ya reprangshia melenshitsütsüla. Lenmang yangludang nallah dena aotsüla aser ya teinyaker balala masü kati tang inyakdaktsütsüla. Kodang lenmang (foot path) yangludir  tasazük ya feet 5-6 tesatem  asütsüla. (tasümang sungdena bener otettsüsa)

Pezübuba nung 2040 ya ano küm 25 bo anünga alinungji alima ya anaben melenshir alitsü südi ta bilemer. Akidangbo oda küm 20 tejaklenbo mobile phone ya amshiba mangashidang liasü, saka tanübo school mezüngdangba otsüla oboula nunger küm 80-90 temapur yipden nungi mesaktetertemia parnok nüngdakba ashitsü atema yipden kolak nung mobile yur jembir. Ya tesüngmangtsü putu ka lir. Anungji küm 25 tsüngdajibo alima ya kotetka inyakteter alitsü ta bilemer.

Anungji teinyaktsü aika liaka Milak ayong aser Küpza Ungma aser Khensa tsüngda aliba ayong Tzüza ayong ya nokdangteta tzüyim ama yangluteter ango aputsü (jaka) tesem külen nungi tesem küleni aotsü atema rong tilala (boat) amshitettsü aser yagi para pani lake ama yanglutetra iba meketa alima  terenlok aika inyaktettsü aser alima-a tebur ajung penzürtema arua kazütettsüsa akümtsü. Iba dak rangloker inyak nungbo koda jungla ta bilemer.

Item ajak ya telongjem, ochi mangdang nung rangloker, mulongsen ajak agi teyari lenmang bushia inyaktettsüjia koka lir. Tangari inyaktetra asenia inyaktettsü.