Congress MLA ti NPF kümogo

Kohima, November 20 (TYO):  Nagaland nung taoba election nung Congress telok nungi adokba MLA ti tanü Honibar nü Naga Peoples’ Front (NPF) telok nung denogo.

Taküm 2015 küm February 5 nü Nagaland tatar senden nung NPF teloki aniba DAN sorkar nung Chief minister, T.R.Zeliang leniba pu sema Congress MLA par tii vote agütsüba ajanga Nagaland nung Congress lenirtem rongnung meputep adok.

Iba sülen, tatar senden nung pa yariba asoshi T.R.Zeliangi Congress MLA ti prongla par sorkar nung aniok aser parnok nem minister, advisor, Parliamentary Secretary aser Deputy Speaker menden agütsü.

Tanü NPF nung adener Congress MLA-temji  S. I. Jamir, Tokheho Yepthomi, C. Apok Jamir, S. Hukavi Zhimomi, Dr. Imtiwapang Aier, Imtikumzuk, Eshak Konyak aser Khekaho Assumi nungertem liasü.

Joko parnok ajak NPF den  denadoker asünungji, tang nungibo yimten maparen ajak nung parnok ti pronglaji NPF züngsem ama amshiang ta tanü Honibar nü Nagaland Legislative Assembly Speaker dangi NPF tir Dr.Shurhozelie aser Chief minister, T.R.Zeliang na pronglai zülu nung agütsüogo.

Congress MLA tii AICC-i ashiba mangai NPF sorkar nung adenba ajanga Congress telok nungi parnokji ken atemabo anentsür liasü.

Angazükba agi, Congress MLA ti prongla NPF sorkar nung adenyonga temzüng ozüngi parnokji maitsütet, iba jagi disqualify mesütsütet.

Tang Congress MLA ti NPF nung adenba ajanga Nagaland tatar senden nung tatar 60 rongnung NPF tatar 46 kümogo aser  tanga yimten teloktem rongnung BJP MLA 4, NCP ka, JD(U) ka aser Independent MLA ti lir.