HM-i Assam dang IS indang tekümdangtsü metetdaktsü

Guwahati, November 20 (Agencies): Home Ministry-i Assam Home department dang, state nung ISIS kiralongrartemi kiralongraba inyaktsüa akok ta tekümdangtsü  metetdaktsüogo, ta ministry nung tongti ketdangsertemi ashi.

Anogo ana tejaklen Centre sorkari, taoba hopta Paris yimti amaker Syria nung amenoka aliba kiralongrar telok, Islamic State (IS)-i India nung tongtibang tesemtem amaktsüa akok, ta sangdonga liasü.

IS-i India nung state pongu aser yimti pezü dak tenük yokdar, ta Home ministry-i metetdaktsüogo. IS-i tenük yokba state temji Jammu & Kashmir, Uttar Pradesh, Maharashtra, West Bengal aser Assam lir, ta ministry-i metetdaktsüogo.

“ISIS ya linük kar atema dang amokmeren ka masü, saka alima ajak atema amokmeren lir. India-i ISIS indang kanga mita atar,” ta New Delhi nung Home minister Rajnath Singh-i ashi.

Iba dak alia ita ka tejaklen Assam DGP, Khagen Sharma-ia, IS aser iba dak sentakba osangtem internet nung bushiba timtiba state ji Assam lir, ta jembia liasü.

“Internet nung ISIS indang osang bushiba dak sentakba nung, Jammu & Kashmir dang nungibo Assam nung timba lir,” ta pai metetdakja liasü.

Home Ministry-i, tawa Paris yimti nung tesem aika amakbaji ajanga Iraq aser Syria na dak alia IS teloki tanga tesemtem nunga kiralongratsü nükjidong aliba tamaitsü sayur, ta ashi.

Assam nung Jihadi züngsemtem aika puogo, ajisüaka tang tashi nungbo Islamic fundamentalist teloki state nung sorkar anema noktakba mali. Assam police-ia, tang tashi nungbo Assam nung ISIS züngsem mesüra telok aliba meteta mali, ta shiogo.