ULFA telok Delhi nung ken o jembitsü asoshi apusogo

Guwahati, November 21(Agencies):  ULFA nung mendenbuba Arabinda Rajkhowa-i anir lennir kar Centre den anünga aliba ken o jembitsü asoshi tanü, Honibarnü New Delhi-i apusoa ogo.

Iba o lemtep linük yimtiba nung November 24 nü akatsü sentong lir aser iba ya ULFA’s ‘general secretary’ Anup Chetia taoba hopta Bangaladesh-i India nem bendanga agütsüba   sülen mezüng olemtep sentong asütsü.

Tayimtsü anenba tesem nung osangbenertem den jembiba mapang, Rajkhowa-i, “Yimjung tsütsü terenlok adoktsü onoki imlar. Olemtep agiba sülenang yimjung tsütsü terenlok koba tashi odar ibaji shitettsü,” ta ashi.

“Onoki Chetia-a iba olemtep nung tendaktsüner. Ajisüaka tang tashi nung pa dentettsü asü medentettsüar ano ashitsü makok,” ta parnoki ashi.

ULFA lennirtem Delhi aoba mapang Chetia dena ajuruteptsü merangtsü.

ULFA telok ngutetsang, ‘general secretary’ Chetia ya Bangladesh nungi November 11 nü India nem bendanga agütsü aser tang New Delhi nung CBI ket nung lir.

Tang Delhi-i aoer Rajkhowa den ULFA lennir temji Chitrabon Hazarika, Sashardhar Choudhury, Mithinga Daimary aser Pranati Deka nunger lir.

2011 küm ULFA lennirtem Bangaladesh nung pua India nunger nem bendanga agütsüba sülen nungi iba olemtep tenzüka akar.