Republic Day nü France Tir tongti tesemdanger asütsü

New Delhi, November 21 (Agencies): Taruba küm January ita nung India Republic Day  sentong nung  tongti tesemdangerji France Tir, Francois Hollande asütsü.

Tang tashi nungbo India aser France napronglai iba atemaji official sangdong kecha agüja mali, saka taoba ita Ato kilonser Narendra Modi-i Republic Day sentong nung tongti tesemdanger asütsü atema France Tir jaokbaji Tiri agizükogo, ta osang jangjaogo.

Yashi France Foreign Minister, Laurent Fabius-i India semdangba mapang Tir Hollande-i  India semdangtsü  osangji jangjatsüogo.

Taoba hopta Islamic State (IS)  kiralongrartemi France yimtiba, Paris amakba lendong nung tajemba agi nisung 132 asüba aser aika yiruba sülen January ita nung Hollande-i India semdangtsü osang ya jangjar.

Hokolbar nü kiralongrartemi amakba sülen ita asem tashi Paris nung ‘State of Emergency’ sangdongogo. Tir Hollande-a Turkey nung G20 summit senden nung adentsü aliba sentong thinenogo.

Taküm January ita Republic Day Parade nung tongti tesemdangerji US Tir, Barack Obama liasü, aser pa den kinüngtsü First Lady, Michelle Obama dena liasü.