PM Modi aser China PM Li na tesentaktep ken o jembi

Kaula Lampur, November 21 (Agencies): Honibar nü Ato kilonser Narendra Modi aser  China Ato kilonser, Li Keqiang ajurua linük ana tesentaktep ken o jembidang Li-i, alima nung tang terenloktak linük tulutiba ana tsüngda mangatettep onük dang nungibo kasa taginüba onüktem timba lir, ta ashi.

“Onük aika tiyongtsü nung linük ana tsüngda tesentaktep. Ato kilonser @narendramodi-i China Ato kilonser Li Keqiang tang mezüng ajuru,” ta external affairs ministry otongdar, Vikas Swarup-i twitter ajanga ashi.

Asean-India Summit mapang jurila senden ka nung China lenir Li-i, China aser India na mangatettep onük dang nungibo kasa taginüba onüktem timba lir, ta ashi.

Li-i, “China aser India na tsüngda tesentaktep aser amalitep tajungba akümba ajanga jenjang tajungba akümba dang masü saka Asia aser alima yimjung, terenlok aser azükaru nunga shilem agitettsü,” ta ashi.

Bangladesh-China-India-Myanmar Economic Corridor yangluba nung China-i India den külemi inyakner, ta paisa shisem.

Beijing-i New Delhi den onük aika nung amalitep tashitaitba akümtsü aser senteper kiralongraba densema alima tebilemtsü onüktem atema inyaktsü imlar, ta Li-i shisem.

Anogo asemnü Asean-India aser East Asia summit nung adentsü atema Modi tanep Malaysia tonga aruogo.

Tanü 13 buba Asean Summit (Association of Southeast Asian Nations) nung jembidang Ato kilonser Modi-i, “Kiralongraba ya alimai ajuruba tayongzükba tuluba kümogo, aser iba ya ajanga ajak kongshir, anungji India aser Asean linüktemi amalitepa regional aser international level naprongla nung kiralongraba anema inyaktsüla,” ta ashi.