Oshi kaji taküm, sadema indaktsütsüla

~ Talitemjen Imchen.

July 14TH 2015 ASLB SANGDONG No. 3 “Arishir Nüngshi Ken” Wapong. I. Sashimeren Aieri yangluba SANGRO/KEN nung kü tangatetba ka ASLB dangi metetdaktsünüa asüngdanger. “Anungji Ojangosü Koma Lir Memelenshi Saka Zülumen Melenshir Yamai Adoktsür” ta aliba nungji OJANG ta asüba olongji nibo ratet ana nungdang amshiteter. Ka TATEM ta amshir aser ka zülutsü OJANG/O TEJANG, koba dang English nung spelling ta ajar. OLONG ta süra English nung WORD ta ajar. Saka ocet agütsüri shinüba yabo ORENOSÜ ta shiner amai nibo achiteter.
Omen/ranglok nungji “Arishir Nüngshi Ken” ta lir. Arishir ta asübaji ratet ana. Ka nisung ka taküm talang aliba, arishia aliba aser ka arishitepba, kati ka arishiteper mesüra kati ka arishir ta amshiner.
Tekong asem buba nung, “Sarir Saku Bener” ta alibaji “Arür Saku Bener” ta amshiner. ARÜR olong agizükyimji, arüa aliba mesüra raratepnüa aliba nungi olong ji nibo agizükner. Saka ARÜR (opposite) mashio olong ji SARIR ta janer. Sarir olong agizükyimji SHI ARISHIR mesüra NOKINKETER dang janer. Yim shia sarir alir, parnoki yim tongdanger alir. Arishir aser sarir olongji mesükteper saka sarir olong nungji aseni aginüba ama tabensaba ratetteter.
Tekong pongububa nung “Temoatsüba Mungsong” ta alibaji nibo MONGSONG ta aginer. MONG olong agizükyim ji, kar arur amongba nungi adokba lir. Asen lima nung MONG inoka ajaba yim tenüng züluyimji reprangdangra ka nung U aser ana nung O ta lir (WAROMUNG, MOLUNGKIMONG aser YIMCHENKIMONG). Iba den nisunger tenüng ajaba ajak nung MONG ta inoksemadok, iba jagi U masü O nungji liromedemner.
Aser jangratemtsü kaji oshi ya pei tetsü oshi asü nungji yangi (scope) timchi ajak asoshi tila kabo yuner. Talisa Ao Oshi nung tesayur aser Ao Oshi nung azünger kaketshir atema. Tatishitsü agi tang asenok oshi zülumen nungi olong kar parnok bushizüngdang nungji tajungba bener arutetra, “nenoki bener aruba ya tai, yamaibo jembia maru, onok yamai dang agitsü jembiadokogo” ta masü asenoka angazüktsü nüngdaker aser tatitang nunga (marks) takizüng ji agütsütsü nüngdaker. Kechiaser oshi ya taküm aser aintsü nüngdakba ka lir.
ASLB nükjidongji ZÜLUMEN LIROMEDEM ta angazüker. Taji, “Yong Ka Nung Yongshilu Aika Alutsü Saka Yongküpbo Ka Dang Asü Ama” olong ka nungi aika medenloka aotsüji tongtipang masü. Saka mesüktepa lirbo ajakji ka küma anioktsü ranglok asütsüla. Saka olong tasen (nüngja tasen) renlokbajiang tongtipang. Aser kodang olong tasen renlokdir iba jagi oshi ainbaji sayur. Aser ibaji olasü nung masü olong agizükyim/tamendakdak nungi kodang ranglokdir akoktsü. Olong kaji koma yanglu mesüra koma ser olongji yanglutsü ta bilemtsüla. Kodang olasüji koma adoktsü ta olongji bilemdir zülumen liromedem ji kodanga sümedema marutsü. Aser kar temeli tamajung ka ASLB züngsem ji arushi nungbo aji joko ojang. English oshi nunga olong karbo medenloka or aika, benjaa kümer timatemba aseni angur. England aser America nungerji koma aor ta masü, aseni oshi amshiyim nungji tajung chitet nungbo parnoka apuzüka amshitsüji tenüngdaktsü.
Yangi kü mekokmin dang asütsü akok, Ao oshi nung Ao Senden Literature Boardi melenshiba olong kar kü mulungi magizüktetba agi arok asoshi bilemer ka ama lemsateper. Iba dang nungi tabensaba nenok ket nung lira ni atema koda tepelatsü!.
(Maneni asüng adok nung…)