Ano Maggi sample 31 tendangner: Sorkar

New Delhi, November 23 (Agencies) : Nestle India, Maggi Noodles anema, sen crore 640 alang ken o benoka aliba dak sentakba nung sorkari Maggi sample 31 tendangner ta apex consumer forum dang shiogo aser Mongulbarnü iba ken o angadangtsü asoshi Apex consumer court-i lemtetogo.
“Food Safety & Standards Authority of India (FSSAI) indang ‘godown’ nungi onoki mapang balala nung yangluba Maggi sample 31 bendena lir. Item Maggi ya onoki tendangner aser iba mapang video-a tangokner,” ta sorkar-i Justice V.K. Jain aser Justice B.C. Gupta nunger aliba telok, National Consumer Disputes Redressal Commission (NCDRC) dang ashi.
Sorkar lawyer temi, mapang balala nung yangluba Maggi sample temji tendangtsü nüngdak, ta ashi.
“Iba ken o ya ‘lead’ aser ‘monosodium glutamate’ na atema kija masü saka Nestle-i chiyutsü asepba pongdang nung tetuyuba tai züluba aser nüngtet tai agütsüba den business-i memelaba inyakba anema lir,” ta sorkar lawyer rongnung kati ashi.
Sorkari Maggi onsara tendangba atema Nestle India aser sorkar na atema jembir, Lawyer tejen, Iqbal Chagla-i Sorkar lawyer tem den kanga sashia olangtepba sülen iba ken o Mongulbarnü angadangtsü lemtet.
“Maggi noodles joko market nung yokdar aser Bombay High Court-i aginüba ama Nestle-i tetendangba ajak takok ngutetogo anungji ano tasen tendangtsü kecha nüngdak madoker” ta Chagla-i ashi.
NCDRC-i tanaben iba chiyungtsü tendangtsü tetuyuba agütsüra iba chiyungtsü alir nüburtem akoksatsü aser ibaji ajanga parnoki ola adoktsü, ta pai shisem.
Sorkar tetuyuba nung mapa balala toku nung yangluba Maggi noodles sample 13 tashi tesüiba October ita tendanga liasü.
Item sample tem ya Mysuru, Karnataka nung aliba Central Food Technological Research Institute-i yoka liasü saka tendangba osang apex consumer court dang ano mesayu.