India ya India nunger lima

India lima dak aketba tajung kaji, iba lima nung tamangba yimsü ajak amangtsü akoker. Ibayongji, alima kintem rongnung India nungsa tamangba yimsü teimba asütsüsa nübortemi külemer. Atangji, India nung tamangba yimsü balala amangertem rongnung tamangba yimsü shia amangba pur nütsüng yongsük züngdangra, Hindu yimsü dak amangertemsa teimba asütsü. Ajisüaka, iba jagi India lima ya Hindu nunger lima ta masü, India senso ajak meyong lima lir. Ibayongji, kodang Hindu nungertemi India ya Hindustan, anungji Hindu nunger lima ta jembidir, idangji Hindu nunger masüba purtem temulung yirur. Ibaji India asoshi kanga lendong lir. Aji oda, yakanü Nagaland aser Assam angh P.B.Acharya-i jembiba ama , kodang Hindu yimsü amanger kati India ya Hindu lima ta jembidir, iba jagi India nunger tanga yimsü amangertem mulungjang nung India nunger chichiba masü amai bilemdaktsür. Iba ama shisatsüji kodang senso ka mulungjang nung idaktsüdir, iba mulungjang jagi pei yimtsüng aser pei lima memeim akümtsü. Atangji, P.B.Acharya ya Hindu yimsü keta asenba sayutsüngir tajung ka lir. Pa temulungtetba aser nükjidongji India lima ya Hindu lima kümdaktsütsü asoshi inyaka alitsüa akok. Iba tangatetba nung pa asangur asüdang nungi tang tambur küma tashi pai India nung Hindu yimsü züindaktsütsü meranger. Iba nungji kecha tai mali.Paa pai shitaka ta amangba yimsü tangar nem amangdaktsür, kechiyong iba jagiang nisung ka temoatsü aser tekümtet angutsü ta pai amanger. Ibaji, Khristan yimsü dak amanger sayutsüngir kati alima meimchir shinga tanüla tesamadaki moudaktsünüba agi Yisu Khrista ajanga anguba tekümtet agizükdaktsünüa temeim agi sayutsüngia jajaba amato lir. Aji oda, Khristan purtemi Khristan purtem teimba ser aliba lima ka nung Khristan purtem masüba purtem reshikangshira mesüra aridokra, ibajibo Yisu Khristai memelaba mapa inyaker asütsü. Iba kasaji Hindu yimsü dak amanger P.B.Acharya ama nisungia angatettsüla. Indiaji Hindustan asütsüa akok saka iba jagi India nung Hindu nungerbo pei chinütsü chiajemtsü aser tanga yimsü amangertembo chiyongtsü nung tasüsa parnok sülen anidaktsü ta masü. Hindu nunger dang süra tanga lima nung alir bendanger (foreigner) asüyonga mashi ka arua litettsü saka tanga yimsü dak amangertembo melitetsü ta masü, linük temzüng ka lateta lir, anungji iba kübok kin kidong aser tamangba yimsü ajak kasasa khuret aser temeten lir. Anungji, bendanger shiba südir süang yimten nungi temelaba lira aitettsü saka melira maitettsü. Tanü putu nung yabo kechi yimsü amanger, kechi kin aser kechi kidong ta asübaji tongtibang masü saka nai pei linük asoshi kechi inyaktetter ta asübajiang tongtibangba lir. India ya Hindu lima anungji  Hindu nunger dang alitsü ta bilemra, Muslim nungba APJ Abdul Kalami tangar kintem, Pakistani dena India tsübutsüsa nuclear aser missiles tashi yanglutetbaji kong endoktsü ? Hindu nungertem dang nungibo Muslim aser Khristan purtemi India temeimba meimer, ajisüaka Hindu nungertemi India nung alir Muslim nungerbo India nunger masü ama bilemra aser Khristan purtem reshikangshira, India lima ya sünepa melitettsü. Aji oda, India linük temzüng yanglurtemi tangatetba tajung nung mangdang tulu yur India ya alima nung tamangba yimsü ajak amangtetba lima asütsü ta lateta yutsüba ama, kechi yimsü amanger südir süang India senso ka ama pei yimsü sademsadema amangtettsüla. India tashi angudakji aji asütsü. Tanü tarutsü India asoshi tia majung kaji Hindu yimsü kanga keta asener telok karibo Mahatma Gandhi tepsetsang Nathuram Godse nem tematiba linük naroküm agüja külemtsüla, kechiyong pai Gandhi tepstebaji Hindu yimsü meimba agi tepset ta jembir. Atangji, Mahatma Gandhii tamangba yimsü ajak kasasa akümtsübua benshi. Iba jagi paibo, na Hindu nunger süra Hindu nunger tajung ka süang, Muslim nunger süra Muslim nunger tajung ka süang aser Khristan süra Khristan tajung ka süang ta dang ajungshia jembi. Tanüa Gandhii sayutsüngiba oji shitak küma benshitet nung dang, alima kintem rongnung India tashi itta aientsü aser tesünep nung alitsü. India ya tamangba yimsü meyong masü saka India nunger lima asütsüla.