PDP-i BJP toktsür Cong den loktep nunga mesüngmangtsü: Omar

Srinagar, November 23 (Agencies): Hombar nü Jammu & Kashmir nung opposition National Conference lenir, Omar Abdullah-i, Jammu & Kashmir nung PDP-i par teloktep party, BJP toktsür Congress aser independent MLA tem den lokteper sorkar akum nunga pai mesüngmangtsü, ta ashi.
National Conference otongdar, Junaid Azim Mattu-i twitter ajanga, PDP-i tanaben Congress aser independent MLA kar den lokteptsüa akok ta osang sashia jembidar, ta sangdong ka agütsüba dak sentakba nung tasüngdangba ka langzüdang taoba state chief minister Omar-i yamaji langzü.
Mattu-i, “PDP-i tanaben Congress aser independent MLA kar den longjemtsüa akok ta osang sashia jembidar. Nai süngmangtsü asü (?)” ta ashi.
Ajisüaka PDP-ibo iba osang nungji ai-aura makai, BJP den teloktep sorkar ya mapangtong tashi alitsü aser tesem nung aliba tesemtem longjemdaktsütsü aser Jammu & Kashmir longjema alitsü, ta shiogo.
“BJP den lokteptsü telemtetba agiba ya, PDP patron, Mufti Mohammad Sayeed-i kanga junga shisadanga party lenir ajak den lemtepa jembir sülenang lemet,” ta PDP osang ajanga ashi.
“2014 assembly election nung nüburtemi shimba temelung nung yur, iba ya maongka tajung ka aser state longjema alitsü ya tayongzükba tulu ka ta agir,” ta PDP tongti otongdar, Mehboob Beg-i osangbenertem dang ashi.
Yaküm state assembly election atongtsü mapang ana nung lia Beg-i National Conference party tokja liasü aser pai, teloktep onüktem nung taoba chief minister (Omar)-i shisa mebulutsüla, ta ashi.
“Iba teloktep ya mapangtong tashi alitsü. Item onüktem atema pai (Omar) shisa mebulutsüla, ta paisa shisem.