Lotha Hoho dang masüngdangi totzü atsütsü memelar

Dimapur, July 16 (TYO) : Wokha district nung Lotha nunger lushi nung totzü adokba tesemtem nung Wokha Zone mesüra district tenüng nung yimtsüng mesüra area katia shinga dena tangatettep yanglua sign süteptsü memelar ta Lotha Hoho, Wokha-i metetdaktsüogo.
Iba telemtetba ya Dimapur nung July 10, 2015 nü Wokha Zone nung totzü adokdak kiburtem den Lotha Hoho ketdangpurtem senden ka mena renemogo ta parnokisa metetdalktsü.
Yimtsüng aser nisung kari danga Wokha Zone nung totzü atsüdaktsütsü asoshi tangar den ken o renemb ajanga timtem kar danga adokra, ibaji pei khuret asütsü ta Lotha Hohoisa metetdaktsü.
Iba denji ano tang Nagaland sorkari MOGPL nem totzü atsütsü asoshi temelaba agüja lir, ibaji file number kecha melii Addl. Chief Secretary & Development Commissioner, Nagaland-i Nagaland Petroleum & Natural Gas Board mendenbuba tenüng nung sign süa lir, anungji ibaji takidak makaba mapa ka asütsü ta Lotha Hohoisa metetdaktsü.
Iba ama inyakbaji state sorkar telemtetba anema lir, kechiyong totzü atsütsüba maparen ama nung sorkar tenüng nung sign süa inyaktsübaji Geology & Mining Department nem tashi agüja lir. Ano, totzü atsünürtem asoshi jangraba ken o meshia metetdaktsüba sangdong nunga file number kecha mali aser ajia shitakba department-i masü saka P&NG Board-i inyak, anungji ibajia state sorkar inyakyim anema asütsü ta Lotha Hoho-isa metetdaktsü.
Iba ama aibelen aika liakasa, state sorkari totzü adokba yimtsüng kar den danga tangatettep ken o renemer, ibajibo takidak makaba mapa ka dang masü saka Naga nunger likalilem dak aketba sobaliba temzüng ozüng anema inyaker asütsü ta Lotha Hoho,Wokha sangdong ajangasa metetdaktsü.