Opposition malibaji majung

Democratic sorkar nung opposition malibaji junger ta kari danga bilemra, iba tangatetbaji India temzüng yanglurtem dak aliba shisatsü aser tangatetba den meputeptsü. Atangji, linük temzüng nung tatar hoho mesüra senden nung kechisüdir süaka opposition alitsüla ta mali saka nübortemi shimtetba yimsüsürtemi akümba democratic sorkar nung opposition-i inyaktsüba shilemji kanga tongtibang lir. Aji oda, yimten nung opposition telokji linük nung mitkartem amai lir. Alima nung nisung ajak tajung dang, anungji ajaki tajung inyakner. Ajisüaka, kodang tebok mesünglir mesüra makamait tia agi tongdir nisung aikati auyatsü marendaker aser ochimashi akümer. Ano, nisung tajung süaka kodang morumoru shisatsü nem kokdaktsüdir, pei akaba agi kodanga tenük masünger, anungji rongsen tali penbur, idangji tim masüba mapa inyaker alir. Iba ama tensa tia matalokdang aser atalokdang pei yimten aser lokti mita alitsü asoshi yimten nung opposition nüngdaker. Talisa tanü asüng asen lima nung yimten yimsüsürtem aser ketdangsertem ochimashiba indang kanga jembir. Iba jagi yimsüsürtem kanga meramaket kümdaktsür. Aji oda, yimten maparen nung kangasa ochimashi aliba agi, nübortemi yimsüsürtembo ajak ochimashi aser auer amai dang bilemer. Tanü tensa yimsüsürtem asoshi tia majung kaji aji asütsü. Iba ama alima tensa tiaba jagi yimten nung opposition kanga tashi itta alitsü nüngdaker. Opposition teloki dang sorkari meshitak inyakba ajak tai pua anidaktsü, anungji parnok nüken tsübua sorkar nung alirtemi ochishia inyaktsü merangtsü. Nübortem asoshi opposition aliba tajangzükji aji asütsü. Senbo endoker saka alijak nung terenlok kecha mali ta asüba tensa tiaji nübortem asoshi temeimtsüka lir. Ajisüaka ano iba dang nungi tamajungba tiaji iba senji kong koma endok mesüra sama ta bushir maliba tensa tiaji asütsü. Iba amaji tim mesüi inyakaka kechiba (?) ta ashir mali aser ochimashi mapa inyakaka tebushir mali ta asüba tensa tiaji opposition malidak ataloktsü. Aji oda, tanü Nagaland State Legislative Assembly nung opposition maliba agi parnokbo pelatepa alitsü saka asenok nübortem asoshibo tepelatsüka masü. Tanüker alidanga süng  ochishia melitetter nung, tanüker malidangbo komaka sademsadema awazütsü ta nübortemi shisabolua bilemtsüla. Tanü Nagaland nung tebilemtsü tulutibaji election nung candidate-tem sen kanga endoker, anungji madokertemjibo yutsür tadokertem asoshia election sentsü menoktsübaji tebilemtsü khuret tuluka kümadoker. Iba election sentsüjibo ayangba sen agibo memenoktettsüa akok, anungji akok tashi ochimashi lenmang bushia election sentsü menoker külenang ano taruba election asoshi sen bendentsü bilemer. Item sen ajungaji Nagaland atema Delhi nungi terenlok mapa inyaktsü yokba sen nungisa agizüktsü. Iba jagi Nagaland merenloktetter. Iba jagi ishika takaba -takaba akümer aser nübortem teimbaka makaba-makaba akümer. Iba ama tensa tia ka nung Delhi nungi yokba sen agi terenlok mapa meinyak ser yimten yimsüsürtem rongnung lemsaa agiba anema ola adoker melira nübortem asoshibo jepaka nüktzü malu asütsü. Iba ama tensa tia ka nung Nagalangd nung alir nübortembo pei shilem rakzüka bener aoba repranga kazütsü masüji, state assembly nung opposition ali mali ta masü saka yimten aser lokti maparen ajak nung wainshin meteta kümkümkümküma pei lima aser nübortem asoshi mitkar ama alitsübaji senso shia tata shilem ama inyaktsüla. Aji oda, Nagaland nung ACAUT telok aliba ya opposition melen nübortem asoshi inyaktsü tentetba telok ka amai lir. Iba teloki inyakba mesüka senso shiai ochimashi mapa anema intyaktsüla aser ochishia alitsü merangtsüla.