Tetsür aser tanurtem yaritsü atema Sorkari Mumbai Police nem gari 94 agütsü

Mumbai, November 24 (Agencies) : Maharashtra nung Devendra Fadnavis-i aniba sorkari tetsür aser tanurtem timtem nung yaritepdang amshitsü atema Mumbai police nem gari 94 agütsüogo.
Sen crore 7 indang mapatong ya Chief Minister Fadnavis-i purapiteta inyakba lir aser sorkari Mumbai Police ket nung Super-Utility Vehicles (SUVs) 94 agütsü.
Gari shia nung women constables asemsem teti alitsü aser gari nung Global Positioning System enoka lir.
“Control room nungi osang sangoktsüba sülen, iba gari yagi teyari nüngdakba tesem tonga aotsü. Ozü Worli police station yagi 2X2 sq. km area repranger, anungji timtem aliba osang angashiba sülen minute 3-4 tsüngda police indang gari jagi tesem oa atongtsü” ta Worli Police station Senior Inspector, Vinay Kulkarni-i osangbener dang ashi.
Taküm küm tsüngda Mumbai nung women & children helplines nung distress calls lakh ka den timba süogo. Aji agi, Mumbai nung aliba tetsürtemi police gari indang mapatong nung temulung melemteter.
“Yimti nung iba mapa tenzükbaji junger, saka iba yagi koba tashi ka teyari agütsütsü ta ni temulung melemteter. Mapang ajak nung call centers aser helplines mapa inyaktsüla” ta Mumbai nung kaketshir Benita Chacko-i osangbener dang ashi.