5 buba Inter Departmental Badminton asayamong tenzükogo

Dimapur, November 24 (TYO): Zunheboto District Sports Council (ZDSC)-i ayonger külen Zunheboto kübok Indoor Stadium nung 5 buba Inter Departmental Badminton Tournament tanü, Mongolbar nü nungi asaya tenzükogo.
“Zunheboto nung tenzükba sorkar mapa inyakertem rong nung telungjem lidaktsütsüsa tan asayamong ayongba atema ZDSC dang pelaba lemsateper,” ta asayamong lapokba sentong nung tongti tesemdanger, Nagaland Parliamentary Secretary, Law & Justice, SIRD, Er. Picto Shohe-i metetdaktsü.
“Lanur aser tain nisungtem ajak taküm nung saisapongtsüji kanga dang tongtipang shilem ka lir,” ta shia, Nagaland nung football sülenbo tongtipangba asaya, badminton asayaba ajanga Zunheboto nung tentetba sorkar department ajunga tali telunjemba akümtsü imlaba olen tongti tesemdangeri tanü lemsatepa liasü.
“Sorkar department ajunga nung ketdangser aser mapa inyakertem rong nung telungjem aser tesendaktep tajungba kümdaktsütsü nükjidong nung tan asayamong ya ayongogo,” ta Deputy Commissioner & Chairman, District Sports Council, Zunheboto, Temsu Longkumer-ia tanü sentong nung metetdaktsü.
Tanü nungi tenzüka anogo 3 agia asayatsü ayongba asayamong nung department 47 nungi asayartemi shilem tagidak lir.