Kohima nung NSCN(IM) züngsem ka apu

Dimapur, November 25 (TYO) : November 24, 2015 nü old bye-pass check gate Kohima anasa mejangjatetba nisung kari Manipur leni aoba truck garitem dang nungi tashiyim agi sen sarur ta osang angazükba sülen DEF Kohima nungi Mobile Unit pur tesem tonga ao.

Iba mapang police-i Manipur kübok Ngamkhu yimer Ngamhlung’er jabaso Indrason ta ser nisung ka apu. Pa ya NSCN (IM) rank – Office Asst. ta jangjaogo aser pa den yariteper ka ammang asübayong jena otet, ta Sub-Divisional Police Officer & PRO Kohima-i sangdong ka nung metetdaktsü.

Police-i Indrason mita reprangdang sen 12,900 bena aliba angu. iba sen ya pai Manipur leni aoba truck garitem dang nungi saruba liasü. Pai ashiba agi parnoki truck gari shia nungi NSCN (IM) tenüng nungi sen 200 nungi 300 tashi saru, ta sangdong nungsa shia lir.

Manipur leni aoba truck garitem dang nungi tashiyim agi sen saruba aser NH-29 nung rakzükraktemba onük kübok Kohima South P.S nung ken o ka benokogo, ta Kohima Police-isa metetdaktsü.