Dimapur nung Viola colony küm 25 jungogo

Dimapur, November 25 (TYO) : May 1990 nung Dimapur district administration-i Dimapur kübok colony ka ta züngokba sülen Bodbarnü Viola colony silver jubilee mungogo.

Iba sentong ya Viola Community Hall nung agi aser tongti tesemdangerji Urban Development Advisor, SI Jamir liasü.

Lokti tejakleni aotsü atema sorkari urban tesemtem renlokdaktsütsü asoshi mapa inyaker. Pai iba mapa asoshi temulung kanga agütsür aser centre dang nungi developmental schemes teyari angutsü atema inyaker, ta tanü SI Jamir-i o jembidang ashi.

Centre-i mapatongtem agizükba sülen terenlok arutsü imlar. Iba dak sendakba nung public-i yariteptsüla kechiyong iba jagidang mapatongtem takok ngua inyaktettsü, ta paisa shisem.

SI Jamir-isa nübortem dang tangatetba melenshitsü aser merükmejuba yimyatsüyatem benshitsü tayongzükba agütsü.

Asenoki tangar atema mebilemtsüra, mapa inyakba nung takok mangutsü. Asenok tangatetba memelenshira asenok tejakleni maotsü, ta paisa ashi.

Sentong nung Dimapur Deputy Commissioner, Kesonyu Yhome (IAS)-ia o jembidang, Naga nunger Putu 21 buba nung alir saka tangatetba nungbo asenoki tangar memenep, ta ashi.

Asenoki tangar menepa akümtsüla aser linük yangerba mapa nung shilem agitsüla, ta Kesonyu Yhome-isa shisem.

Asenoki tang nungi mapa metenzükra, tarutsü nung jana anepaluba maparen nung tetsükdaktsü jenti ajurutsü. Viola colony nung alirtemi waste management system azüoktsü atema inyakyim tasen kar apiteta inyaktsü imlar, ta Dimapur Deputy Commissioner-isa ayongzük.

Tanü jubileemung nung Viola Colony nung alir tambutisang Chubanungsang (84) aser tantsütila Nukshila Imsong (85) na nem sempet agütsü. Iba sentong nung Viola colony chairman M Panger Imchen-i tesentepertem pela agizük.