Impur 2040

Tang ser küm 25 sülen 2040 küm  Mokokchung ya kechikomaka asütsüla ta bilema Mokokchung town nungi tenzüker Mokokchung district ajunga ya yimti ka ama bilema yanglutsü asoshi sentong yangluba mapang  nung ya, 2040 kümji Impur yaa komaka asütsü ta bilema inyaktsübaji ABAM asoshi kanga tongtibang teinyaktsü mapa ka kümogo. Aji oda, Impur yaa Mokokchung district kübok tongtibang tesem ka asünungji 2040 küm tashi nung Mokokchung district renloker alitsü atema sentong yanglurtemia temetet Impur asoshia bilema inyaktsü imlar. Tangbo Impur ya Ao Baptist Arogotem office mapa inyakdak aser lokti senden alidak ka dang kümogo. Ibajia tongtibang saka iba kisümg  jagibo Impur aküm maketer, anungji temulung masür. Akhidangbo, Impur ya Ao arogotem adenshidak tesem ka dang masü saka Naga lima nung kaketshisatsü tajungtiba angudak aser taneptsü angudak mozü ki tajung aliba tesem ka liasü. Iba jagi Naga lima tesem balala nungi kaketshisatsü bushia arua Impur nung azüng aser Impur mozü kidang shirangertem arua taneptsü ngur ao. Item jagi Ao ta asüba kin meraketdaktsü. Aji oda, Impur nung Naga nunger aika tajung kümogo. Iba kasa jenjang nung 2040 kümbo Impur wangshiwangshia alitsüsa tang nungi küm 25 asoshi sentong yanglua tenzüktsüla. Impur ya ABAM nung tenzükertem office mapa inyaktsü asoshi aliba tesem ka dangbo masü. Iba tesem ya temeshi ainlen senzürtem anogo shia nisung karbo arua amongba tesem ka asütsüsa asenoki yanglutettsüla. Iba denji külemi Clark Memorial Higher Secondary School (CMHSS) ya kanga junga shia arudaktsütsüla. Ano, osang tajung kaji Impur Bible School (IBS) nungbo tang tashi asenok dang masü saka tangar Naga kintem nungia aika arua azünger. Aji oda, tetenzük dang nungi tang tashi nung iba Bible School nung züngtettertemi tesem balala nung Tsüngrem mapa inyakbaji zünger mezüngma jangratema angur. Item rongnungji tang Myanmar nung Konyak Baptist Mongdang nung Executive Secretary-bo Impur Bible School nung züngtetba nisung ka lir. Iba amaji Nagaland nung dang masü saka Nagaland arrtsü adena orr meimlaba tesem aika nung Tsüngrem mapa inyakertemji Impur Bible School nung azüngertem ajurutsü. Itemji asenok tepela aser tashi angudak aser Tsüngrem mapa inyaktsü asoshi tashi itshidak asütsü. Item ama school-ji  2040 kümbo tajungba, tuluba aser temaba asütsüsa asenoki yanglutettsüla. Kena osang tajung kaji, tangbo ABAM saru yimya melenshiba agi, ABAM nüngdak nung amshir anüngtsüsa sen arur ta angazüker. Iba asoshi ABAM lenirtem dang pelar aser Tsüngrem tenüng asanger. Aji shitak, süra 2016 küm ABAM senotsü sentong nungbo CMHSS aser IBS ana ya tajungba kümdaktsütsü asoshi senotsü lemzüktsütsüla ta bilemer. School ajungtsübaji tesayurtem dak tuluka keta lir, anungji ita sen aika agütsür tesayur tajung kar bushiloka anir arutetra, iba jagi küm asem-pezüka nungbo school-ji akhi ama jungadoktsü. Atangji, nüngdakra ketdangser aser inyakyima dena melentsüa akok. Iba kasaji IBS nunga sen teimba endoka temulung agütsütsüla. Ano, osang tajung kaji Impur mozü kibo shia arudaktsür amai    angashir, anungji tang nungi inyakbaji 2040 küm tashi nungbo kiojen tuluba kümer shiranger tapu balala yaritsü asoshi department peria lapoker specialist doctor aika alitsüsa ABAM-i inyaktsü imlar. Ano, asenok teinyaktsü kaji akhidang lapoka aliba Baptist English School shibangadoker süra yangji zünger aser mazüng mapa mangu alirtem mapa inyaktsü angazükdak asütsüsa Skill Development Institute ka lapoka light yangluba (electrician), tzü pipe enoktsüba (plumber), electronics oset yanglushitsüba, chiyongtsü yangluba, janaona agi tagitsü oset yangluba (recycle) mapatem ama sayura, ano iba jagiang asenoki lanurtem  aika tagidak akaba senso tajung kümdaktsütettsü. Asenok ABAM mapaji samaa aliba tanüla anir aruba mapa inyaktsüba rongdak nüngdak sülenbo 2040 küm Impurji temeshi aienlen senzürtem amongdak, shi aser tanüla nung taneptsü angudak, kaketshisatsü tajung angudak aser Naga kin ajak nungi Tsüngrem o bushitsü adenshidak tesem tongtibang ka küma yanglushitettsüsa tang nungi mapa tenzüktsübajiang tongtibangba rongdak nüngdak ka asütsü.