Aamir-i pa bilemba jembiogo, India ya ajak atema: Mamata

Kolkata, Nov. 26 (Agencies): Bollywood actor Aamir Khan pusema Brihostibar nü West Bengal Chief Minister, Mamata Banerjee-i, pai pa tebilemba jembibaji democratic temeten ka lir aser nisung kar dang linük toktsür oang ta ashitsü nisung shinga dak temeten mali, iba linük ya ajak atema, ta ashi.

“Nisung kar dang iba linük ya toktsür oang mesüra Pakistan-i oang ta ashitsü shinga dak temeten mali. Asenok ajak iba linük, India senso lir,” ta Banerjee-i ashi.

Laisa Hindutva teloktem aija, nashi shi achiba kija atema nisung tepsettsü shinga dak temeten mali, kechiyong India Temzüng ajanga pei sensotem dang sayutsüngitsü temeten agütsür, ta ashi.

Minority tem senden ka nung jembidang Mamata-i, “Iba linük nung shingaia parnok anema kecha mejembiteter. Asenoki kechi jembitsüla mesüra mejembitsüla, ibaji parnoki lemtettsü. Aamir-i pa tebilemba aser la kinüngtsüi ashiba jembiogo. Pa dang iba linük toktsür oang ta ashir. Iba linük toktsür oang ta ashitsüsa na shiba (?) Iba linük ya ajak atema. Iba ya asen tetsü tasoli,” ta ashi.

Tawa Aamir Khan-i, taoba ita trok-ti tsüngda linük nung akhümtsübutep maliba tensa lir ta jembiba sülen tesem aikalen nungi pa aitsüba mapang ka nung tanü Mamata-i pa pusema jembiogo.

Anogo ishika tekaklen Indian Express-i ayonga akaba Ramnath Goenka Excellence in Journalism ceremony nung jembidang Aamir-i, “Kiran (pa kinüngtsü) küna taküm piyong India nung liogo. Tang mezüngsüa lai, lar tanur atema tsübua bilemtsür, lai tan tensa atema tsübur,” ta jembia liasü.

Actor Shah Rukh Khan-i linük nung akhümtsübutep maliba o jembiba o tangari aitsüba atema Mamata-isa aitsüogo.

“Parnoki Aamir aitsüogo. Parnoki Shah Rukh-a aitsüogo. Parnoki A R Rahman aitsüogo. Asenoki jembiba mesüra asenoki achiba lemtettsütsüsa parnok shiba(?)” ta lai asüngdang.

“Onoki kechi achitsüla mesüra machitsüla, ibaji lemtettsütsüsa nenok shiba(?) Nisung kati nashi shi achiba ajanga tepsettsüsa shinga dak temeten mali. Ni an shi chira nenoki kü dang kechi inyaktsü (?) Nenoki ni jail nung puoka yutettsü ta bilemra, ni jail nung lokti den alitsü aser ni tera anisüngzüktsü,” ta lai ashi.

“Ajisüaka nenoki ni menokdangtettsü. Ni kecha züngshia mali. Iba linük nung tetsübu agi nisung ajak tebang shibanger liaka nibo meshibangtsü. Ochi temeten atema ni raratsü. Asenok ajak adianu aser aianutem lir aser asenok ajak dak temeten kasa lir,” ta Chief minister-i ashi.

“Linük matsüngdang tasüngdangba kaji- asenok akhümtsübutepa alitsü asü masü(?) India Temzüng ajanga iba linük senso ajak nem kasa temeten agüja lir. Asenoki tamangba yimsü ya kiralongraba den memeyokteptsüla. Kiralongraba nung tamangba yimsü mesüra kin-kidong mali. Kiralongrartemji kiralongrar, aibenertemji aibelener,” ta lai ashi.

Laisa, nisung shingaia minority tem dak temeyong metoloktsütsüla aser kiralongrartem ta mashitsüla, kechiyong Hindu nungertema kiralongrar sütettsü, ta ashi.

“Ni kü adianu minority tem shinga daka temeyong metolokdaktsüner aser kiralongrar ta mejadaktsüner. Kiralongraba nung tamangba yimsü mali. Hindu nunger kata kiralongrar asütsü akok. Lokti anema inyakertemji lokti anema inyakertem aser kiralongrar temji kiralongrar. Parnok tamangba yimsü mali,” ta lai ashi.

Mamata-isa, linük nung akhümtsübutep maliba atema lungkak aittsüsa süra Delhi nung lungkak aittsü la renema lir, ta shisem.