Z Kire-i Kohima nung Music Gym semzüktsü

November 26 nü Kohima nung DGP nungi anisüngzüker alisang, Z. Kire-i Kiredilie Kire meyong ‘Music Gym’ semzüktsüdang o jembiba noksa nung angur.

 Kohima, November 26 (TYO): Ken atentsü aser kententsü telok tentettsü jangrar saka ken busihdak aser tendangdak tesem maliba den oset peria malirtemi tang nungibo ‘Music Gym’ nung itemji inyaktettsü. Iba Music Gym ya Kezieke colony, Kohima nung tanü Brihostibarnü lapok.

Entrepreneur aser sound engineer Kiredilie Kire meyong ‘Music Gym’ ya NACRSCC Evangelist Kethosetuo Sachü-i sarasademba sülen DGP nungi anisüngzüker alisang, Z Kire-i semzüktsü.

Kiredilie Kire-i meranga inyakba tenüngsanga ashiba mapang, Z Kire-i, “Lanur aikati sorkar mapa anga arishir saka Kiredilie-i entrepreneur ka asütsü shimtetba ya kanga junger. Sorkar mapabo joko süngkangogo. Sorkar mapa nung latetja aliba dang nungi noklang shilem dak tema nisung shimoka lir,” ta ashi.

Pai, “Naga nunger nem ken aser music tsütsü Tsüngremi sempet tulu agüja lir anungji music nung ‘entrepreneurship’ tenzükba ajanga tajangzük aisü nung angutsü.

Music Gym nung acoustic aser electric oset amshia ken tenshia kazütsü tesem lir. Anungji ken bushiner ajaki sen terara agütsür iba tesem amshitettsü.

Iba sentong Vilhoukhotuo Kire-i ketdang asü Chatha Kire-i ken aten aser Dr. Neilakuo Kire-i tepela o lemsatep.