India o Pak na Bilateral Cricket Series Sri Lanka nung asayatsü

Dhaka, November 26 (Agencies): Mapang talangka atsütepa arur külen India aser Pakistan nati par bilateral cricket series asaya Sri Lanka nung asayatsü renemogo.
India aser Pakistan nati taruba December ita 15 nü nungi tenzüka One-Day International (ODI) 3 aser Twenty20 (T20) asaya 2 Sri Lanka nung asayatsü asoshi tan renemer lir.
Sri Lanka nung ayongba asaya nung shilem agitsü asoshi Pakistan Cricket Board(PCB)-i Pakistan Ato Kilonser, Nawaz Sharif-i aniba sorkar nungi temelaba agiogo saka India sorkari Board of Control for Cricket in India (BCCI) nembo ano temelaba magütsüi lir.
“India aser Pakistan nati Sri Lanka nung asaya 5 densemba series asaya asayatsü renemogo,” ta Indian Premier League (IPL) nung mendenbuba, Rajeev Shukla-i tanü osang jangjashitsü.
India-i United Arab Emirates (UAE) nung iba asaya asayatsü memulungba aser Pakistan-ia India nung asayatsü memelungba yong mapang talang ka atsütepa arur külen par linük anati tan Sri Lanka nung asayatsü asoshi renemer lir.
Taoba mapang, 2008 küm Mumbai lendong ataloka par linük ana tsüngda tesendaktep mejungi akümba sülenbo India o Pakistan nati tan mezüngsüa bilateral series asayatsü renemer lir.