Smart glass tasen ka ngutetogo

London, November 27 (Agencies): Britain nunger scientist temi touchscreen oset tasen ka yanglutetogo aser iba oset ya ajanga ‘power’ kanga ajema agir. Iba den külemi screen nung anü tesangwa indang indanga yanglok yonga jangja reprangteter.

Taruba küm ishika tsüngda nung tang ngutetba smart glass yagi tang amshia aliba LCD touchscreen melentsü asoshi parnoki company tulu kar den jembishinüdar, ta sciencealert.com ajanga metetdaktsü.

University of Oxford kübok Bodie Technologies-i ngutetba smart glass ya ajanga tamshirtemi pei smartphone teti charge asütsü kangabo menüngdaktsü.

“Iba oset ya ajanga market kenyongi tasen ka lapoktettsü. Tang aliba smartwatch aser smartphone tem teti charge asütsü nüngdaker, ajisüaka item oset nung iba smart glass ya enok nungbo hopta nung khen dang charge asü yonga ajungtsü aser ibaji ajanga ‘power kümzüktettsü,” ta scientist tem rongnung ka, Peiman Hosseini-i ashiba The Telegraph ajanga metetdaktsü.