Test Match Series: India-i 2-0 agi South Africa kokogo

Nagpur, November 27 (Agencies): Tan test match series pezü asayamung nung India-i 2-0 agi South Africa kokogo. Iba series nung linük ana tsüngda match 4 asaya liasü aser Vidarbha Cricket Association Stadium, Nagpur nung tembangogo.
Tanü asaya kija nung Ashwin-i over 29.5 aonba nung runs 66 ang agütsü saka wicket 7 tashi agi. Ano, Leg spinner Amit Mishra-ia wicket 3 agi.
Iba takok anguba pelaba lemsatepdang India test captain, Virat Kohli-i, off-spin aoner Ravichandran Ashwin-i tasembuba asaya nung wicket ajak agi 12 tashi agiba ajanga India-i run 124 agi South Africa madak takok angu, ta ashi.
Pai, “Ashwin ya tang alima nung spin aoner rongnung tajungtiba lir,” ta Vidarbha Cricket Association Stadium nung Hokolbar nü ashi.
Tanü asaya nung ‘Man of the match’ angusang, Ashwin-i taküm test asaya nung wicket 55 agiba ajanga 2015 küm test wicket timba agisang kümogo.
Tanü akokba den Mohali nung akoba dena India-i anaben kokogo. Bengaluru nungbo tzünglu aruba ajanga masayatet. Iba series indang tatembangba asaya taruba December ita 3 nungi 7 nü tashi Ferozeshah Kotla, New Delhi nung asayatsü.