Asür Khekiho Zhimomi den asüpila sentong agiogo

Hokolbarnü Agri expo Site  Dimapur nung asür Khekiho Zhimomi den asüpila sentong agidang Nagaland Chief Minister T.R. Zeliang-i o jembiba angur.

Dimapur, November 27 (TYO) : November 27, 20215 nü Agri Expo site Dimapur nung Nagaland nungi taoba Rajya Sabha MP asür Khekiho Zhimomi den asüpila sentong kanga meraketa agiogo.
Asür nem tetushi agüja 1st NAP Chumukedima-i guard of honour agütsü aser Chief Minister Nagaland, T.R Zeliang-i state sorkar tenüng nung tasür kibong den asüku lemsatep aser asür Khekiho nem tetushi agütsü.
Asür Khekiho Zhimomi ji kanga dang tasütait, teindang aser mangdang aliba lennir ka liasü aser pa den külemi inyaksema arudang tangazükba jenti nguogo, ta T.R Zeliang-i ashi.
Asür Khekiho-i Parliament nung Naga nunger atema inyakdang Naga yimten tebilemtsü aser Article 371(A) atema kanga meranga noktak, ta chief minister-isa ashi.
Nagaland nungi Lok Sabha M.P, Neiphiu Rio-ia o jembidang, asür Khekiho ji lennir asütsü atema sotet aser pai ochi jembitsü atema tetsübu kecha maliasü, ta ashi.
“Pa dak Naga nunger tanela liasü aser yimten lennir ka ama pai tangatetba tajung nung noktak aser iba nungji noktaka lia iba akümli nungi pilaogo” ta Rio-isa shisem.
AIIMS Delhi nung la kinungbo anepaluba aser pa asütsü mapang tashi tatalokbatem indang osang asür kinungtsü Khezheli Assumi-i asüpila sentong nung metetdaktsü.
Sentong nung Sumi Officers Union Nagaland tenüng nung Himato Zhimomi (IFS) aser Y.Kikheto Sema(IAS) nati o jembi aser Sumi nunger MLA tem tenüng nung R&B Minister, Y. Vikheho Sumi aser MLA G. Kaito Aye nati o jembi.
Asür Khekiho Zhimomi den asüpila sentong nungsa Noke Wangnao o Thenucho Tunyi nati medemertem tenüng nung aser kinüngertem tenüng nung K.Hollohon, PHE Minister Tokheho, H. Kughaho Zhimomi aser tanurtemi o jembi.
November 26, 2015 nü AIIMS Delhi nung asür Khekiho Zhimomi alima nungi pila ao. Pa mang Brihostibar aonung 9:20 ako meta Dimapur Airport tonga bener aru aser tanü Agri Expo site Dimapur nung pa den state funeral agia liasü.