MP nung yi menokdangtsü: Chouhan

Bhopal, Nov. 28 (Agencies): Honibar nü Madhya Pradesh chief minister, Shivraj Singh Chouhan-i, state nung yi dokan tasen melapoktsü mesüra yi yangluba majungshitsü saka state nung yi nokdangtsü sorkar tebilemba mali, ta ashi.
Singh chief minister inyaker Deobar nü küm 10 abensaogo.
Bihar chief minister, Nitish Kumar-i Bihar nung yi nokdangtsü sangdongba dak sentakba nung osangbenertemi MP nunga yi nokdangtsü asü (?) ta asüngdangba langzüdang Chouhan-i, “Ibaji kanga tasak, kechiyong asen state nungbo yi ya loktiliba aser sobaliba balala den sentaktepa lir,” ta ashi.
“Ajisüaka yi dokan tasen lapoktsü atemabo sorkari temelaba magütsütsü,” ta chief minister-isa shisem.
Tang linük nung akhümtsübutep mali ta o toktepba dak sentakba tasüngdangba ka langzüdang Chouhan-i, tang iba onük nung o toktepbaji tetezü maka. Linük nung akhümtsübutep lir. Nisung ajaki pa mesüra la bilemba sadema jembiteter. Linük tesem kar nung tatalokba ishikaji akhümtsübutep maliba den mesentakteptsüla, ta ashi.