Sonia aser Modi na ajurubaji tetenzükba tajung ka: Centre

New Delhi, November 28 (Agencies): Honibar nü Centre sorkari, GST Bill atema Ato kilonser Narendra Modi, Congress Tir, Sonia Gandhi aser taoba Ato kilonser Manmohan Singh nunger ajurutepbaji tetenzükba tajung ka lir, ta ashi.
“Kanga junga tenzüktetogo. Ato kilonseri Sonia den senden amenbaji kanga junga kaogo,” ta tanü Parliamentary Affairs Minister, M Venkaiah Naidu-i metetdaktsü.
Yasüng Ato kilonser Mode’er kidang, 7, RCR residence nung senden amendang Sonia-i lar party-i iba Bill pusemer ta shiogo, ta Naidu-i ashi.
“Parnoki (Congress) temelenshi kar dang aginer. Ni temelung alemer,” ta pai ashi.
“Nüburtem aser nisung ajaki GST Bill agizükdaktsüner,” ta paisa shisem.
Goods and Services Tax (GST) Bill indang jembitsü atema Hokolbar aonung Ato kilonser Modi-i taoba Ato kilonser, Manmohan Singh aser Sonia Gandhi na par kidangi jaoka liasü. Iba senden nung telemtetba kecha magi, ajisüaka ano maneni parnok ajuruteptsü bangjemogo.
Congress-ia iba sendenji tajung liasü aser GST bill nung parnoki akhangbatemji sorkari ataloktsütsü imlar, ta shiogo.
Iba senden tembangba sülen osangbenertem den jembidang iba senden nung densemsang Union Finance Minister, Arun Jaitley-i, “Congress party lenirtemi iba bill nung onük asem benok. Item onük tejen o aser iba dak sentakba den onük asem nungji sorkari parnok nem telangzüba agütsüogo,” ta ashi.
“Congress party lenirtemi par party tsüngda lemteptsü aser iba sülen sorkar aser parnok tsüngda tongteprateptsü, iba sülen maneni iba onük nung o lemteptsü,” ta paisa ashi.
“Taruba hopta Parliament nung mapa akumtsü asoshi Parliamentary Affairs Minister M Venkaiah Naidu-i Parliament anaprongla nungi Congress party lenirtem den tongtepratepa ozüng ajak (GST Bill nung aliba) indang jembitsü,” ta Jaitley-i ashi.
Yasüng Modi-Sonia-Manmohan senden nung Jaitley dak alia Naidu-a densema liasü.
Ano Congress lenir Anand Sharma-ia osangbenertem dang, “Iba senden amenba sülen onok Congress party telung nunga o lemtep akatsü melungogo aser sorkaria Congress-i akhangbatemji süoki ia reprangdangtsü. O lemtepba tembangba sülen ano maneni tongteprateptsü,” ta ashi.
Sharma-isa, GST shitak benokbajibo Congress Party lir, ta ashi.
Tang Centre nung aliba NDA sorkar aser Congress party na tekong merangtepba ajanga taoba Parliament senden nung Goods and Services Tax (GST) Bill densema tongtibang bill aika magizükteti liasü.
Tamalen Finance Minister, Jaitley-i, GST Bill agizüktettsü atema Ato kilonseri ajak den jembitsü melunga lir, ta metetdakja liasü.
Iba bill atema Jaitley-ia Congress lenir aika den jembiogo.
“Ato kilonser level tashi nunga onok tarendakba kecha mali. Tesüiba mapang nunga yamaji maliasü, aser tanga mali. Pai (Ato kilonser) ajak den jembitsü melunga lir,” ta Jaitley-i ashi.