City Law College Freshers’cum Parting social sentong agi

Dimapur, November 28 (TYO) : Lokti nung tensa tiptema ayutsü atema aser ano kija den lokti ka indang yimyatsüya azüoktsü atema ozüng ajanga tongtipang shilem agir, ta Retd Additional Director, Land Resources Development, Moatoshi Longkumer-i ashi.
Honibarnü City Law College, Burma camp nung Freshers’ cum Parting social sentong nung tongti tesemdanger o jembidang Moatoshi Longkumer-isa ashiba agi, asenok ajaki asen taküm sadoksadoka, lendongtsüdong kecha melii tepela nung linür saka ibaji chichiba lima nungbo majurur.
Chichiba alima nungbo nisung temeyoktep alir aser yamaji nisungtemi yimyatsüya balala amshir aser karibo lokti nung tensa raksatsütsü atema inyaker. Iba nung ozüngji kanga tongtipang, kechiyong ozüng ajanga dang lokti nung liromedem bener arutsür. Ozüng ajanga meimchirtem libaliro azüoker aser lokti nung tensa tiptemtsür aser tashiyim mapa ajururtem asoshi temeten bener arutsür, ta Moatoshi-isa shisem.
Lokti ka nung tepela aser tesünep bener arutsü atema ozüngji kanga nüngdak. Ozüng ajanga lokti nung tashiyim mapa azüoker. Anungji lawyer tajung ka asütsü atema nisung ka dak jembishinü sempet alitsüla, yimyatsüya tajung aser tangar akoktsü atema shisatsü alitsüla, ta tongti tesemdangerisa kaketshirtem ayongzüka jembi.
Tanü agiba sentong nung Principal, P Leonard Aier-i college indang tamaitsü noksa sayatsü aser tajungshi o jembi. Sentong nung Imliben Lemtur-i tir o jembi aser kaketshirtemi shilem balala agia liasü.