Philippines-i S Korea’er fighter jet tayimtsü 2 alizükogo

Manila, November 28 (Agencies): Philippines-i alizükba sülen South Korea-i yangluba FA 50PH fighter jet tayimtsü 2 Philippines kübok Clark Air Base tanü, Honibar nü tongtsüogo.
China den South China Sea ken o benoktsü tenzükba sülen Philippines-i küm 10 tsüngda nung tan mezüngsüa supersonic fighter jet tayimtsü tasen alizüka par mitkar tashi tali itshitsü maparen tenzüker lir.
Tanü Philippines tonga aoba tayimtsü anaji Philippines-i Seoul nungi alizüktsü asoshi renemba tayimtsü 12 rong nung densema lir.
S Korea tayimtsü anishirtemi Seoul nungi taoba US mitkar tesep, Clark Air Base tonga anir aoba sülen tayimtsü anaji Philippines Defence Secretary, Voltaire Gazmin-i agizüka liasü.
“Philippines-i tanaben supersonic jet tayimtsütem amshitsü tenzükba ngua kanga pelar,” ta Gazmin-i tanü tongtsüba tayimtsü tendanga reprangshiba sülen metetdaktsü.
Tanü tongtsüba tayimtsü anaji China den mangatettep ken o adokdak, Palawan asetkong tsütsülen duty inyakdaktsütsü sentong aliba olen ka paisa metetdaktsüogo.
Philippines-i taoba mapang, 2005 nung kanga tejen akümba ajanga US nungi alizükba F-5 Freedom Fighters jet tayimtsütem amshi anenba sülenbo tan mezüngsüa supersonic jet tayimtsü alizüker lir.