Suu Kyi-i NLD yimsüsürtem den tongti senden ka amen

Myanmar nung tentetba National League for Democracy (NLD) yimtenren telok lenila, Aung San Suu Kyi-i lar NLD yimsüsürtem den Yangon yimti nung tongti senden ka tanü Honibar nü amenba noksa nung angur. (Yangon, November 28)

Yangon, November 28 (Agencies): Myanmar nung democracy yimsüsütsü yimya benoktsü asoshi nokdakla, Aung San Suu Kyi-i lar National League for Democracy (NLD) yimtenren telok yimsüsürtem den Yangon yimti nung tongti senden ka tanü Honibar nü menogo.
NLD teloki tan November ita 8 nü agiba election nung parliament menden noklang nung shilem 80 shi ajangzükba sülen nüburtemi imlaba ama, par linük nung temelenshi tajung bener arutsütsü terenemshiba agia Suu Kyi-i tanü sendenji jatepa amenba osang jangjaogo.
Lar NLD teloki tan election nung takok tulu nguaka, Suu Kyi-ibo Myanmar linük Tir menden mebentettsüsa tang jenjang tamajung ajurua lir.
Linük temzüngi bendanger ka den kibong akümer mesüra pei chirnuri bendang senso agia alir ka nem linük Tir menden abentsü temeten agüja maliba yong Britain nunger den kibong akümba den külemi, jabaso anapronglai Britain senso agia aliba yong Suu Kyi-i Tir menden abentsü temeten monguteti lir.
NLD telok tali lungjema alitsü aser NLD yimsüsürtemi tazüokba nung melira parnok merenshitsü olen ka Suu Kyi-i tanü senden nung sangoktsüba osang jangjaogo.
“NLD yimsüsür kati danga nübur teimla meraksatsütsü metetdaktsür kechiyong parnoki asen telok dak teimla ajak yur NLD nem linük yimsüsütsü tashi abentsü jenjang bener arutsü,” ta Suu Kyi-i tanü senden nung metetdaktsü.
“NLD yimsüsürtem rong nung jurila telok metentettsü saka ozü NLD telok rong nung tali telungjem alitsü tajungshiba olen ka ozü lenila, Suu Kyi-i tanü senden nung metetdaktsüogo,” ta Yangon nungi shimba NLD MP, Thet Thet Khine-ia tesülen metetdaktsü.
Ano, Myanmar nunger sensakertem den amaliteper ta sayua, NLD MP-temi par ita sen noklang nung shilem 25 agi tajemba agitsü telemtetba ka tanü agia liasü.
Tan NLD teloki linük yimsüsütsü tashi abentsüsa jenjang tajung nguaka, mitkartemia par linük yimsüsütsüren nung tongti shilem agitsüsa tashi bena lir kechiyong mitkar lenirtem nem parliament menden noklang nung shilem 25 abentsü temeten linük temzüngisa agüja lir.
Tan shimteta aliba Parliament-i sangküm 2016 küm January ita tashi yimsüsütsü tashi abenba sülen ang NLD teloki sorkar tasenba tentettsü sentong renemba osanga jangjaogo.