Miss Nagaland 2015 Semi Final, ayir ti-i tongtetogo

Dimapur, November 28 (TYO): Beauty & Aesthetics Society of Nagaland (BASN)-i Miss Nagaland 2015 nung Semi Final tongtetertem tenüng metetdaktsüogo.
Tan Miss Nagaland tetoktepba nung shilem agitsü asoshi shimtetba ‘preliminary round’ nung parnok 16 dena liasü aser iba round nung shimtetertemji district shia nungi tanabuba jenjang nung takok angurtem den toktepdaktsü, ta BASN sangdong ajanga ashi.
Tetoktepba ajak tembanga arur tatemsa parnok ti (8) Semi Final asoshi shimteta lir aser parnok tsüngda Miss Nagaland 2015 asoshi tokteptsü. Semi Final asoshi shimteter temji December 3 nü Kohima atongtsü aser iba sülen parnok shilem junga agitettsü asoshi tesayuba kar agütsütsü, ta kasa sangdong ajanga ashi.
Küm shia Nagaland nung tobur tajungtila shimba mapang BASN-i acha ayanga shilem agirtem nem tesayuba tajung agütsür aser temelenshitsü tem ashir aser ibaji ajanga tetoktepba nung dang masü saka akümli piyong atema tajangzük angur.
Lendina Constance-i lokti liba nung agizüktetba yimya liro (Etiquette) tsütsü aser tesüiba mapang Miss Nagaland aser Miss North East Runner Up, Sentila Ababe-i jembishinu tsütsü tesayuba agütsütsü. Iba den külemi Youth Net nungi Strategist & Nune Chase-Training Consultant, Lezo Putsure-i ‘Personality Development’ tsütsü renemshitsütsü.
Taküm Miss Nagaland toktepba sentong nung Adang Jamir Choreographer asütsü aser BASN nung züngsem, Temsumenla Pongen-i temesüng oshi jebishinü tsütsü renemshitsütsü.
26buba Miss Nagaland contest ya December 9, 2015 nü Hornbill Festival den sentaktepa ‘Regional Centre Of Excellence for Music & Performing Arts,’ Jotsoma nung akatsü.
Iba sentong nung Naga Idol tem, Rugs & Virie aser Oren Mozhui nungeri shilem agitsü.
BASN nung züngsem Lipokzulu-ia shilem kar agitsü sentong lir aser tesüiba mapang Miss Nagaland aser tarensen balala nung takok angurtema sentong nung angutsü, iba den külemi 2005 Miss Nagaland aser 2006 Miss Northeast, Tiarenla Jamiri sentong ketdang asütsü, ta kasa sangdong ajanga metetdaktsü.