Temenen tapu ka !

Nisung tepsetba, nüktapangta aser nisung ashioktsüba mapatem ajakji Tsüngrem tsüngdang temenen ta asenoki meteta lir, Aji oda, item temenen mapatem nung jagibo asenok aika jenbua alitsüa akok. Ajisüaka, asenoki temenen-a ta mezüngshiba temenen tapu ka agi asenok anogo shia Tsüngrem nungi tepilaba-tepilaba odakja alitsüa akok. Iba temenenji asenoki tajung inyaktsü bilemer meinyakba temenen asütsü. Asenok aikati Tsüngremi temulungjang dang agir asünungji temulungjang nung tajung inyaktsü bilemba kija jagi Tsüngrem mulung chidaktsür ama bilema alitsüa akok. Ajisüaka, tajung inyaktsü temulung nung bilemer mapa küma meinyakbaji Tsüngrem tsüngdang aibelen tulu lir. Laishibai ashir, tajung inyaktsü bilemer meinyakbaji TEMENEN. Iba temenenji asenok aika atema anogo shia Tsüngrem tsüngdang menaba tai temenen ka asütsü. Kodang asenoki temulung nung tajung inyaktsü bilemer meinyaker, ibaji temenen ta Yakob tapu 4:17 nung shia lir. Asenoki aiben tajung inyaktsü bilemer saka mazüngba agi kenlir inyaktsü ayur mesüra makoktsü amai bilemer mesüra iba tajungji inyak nunga kecha balaka masütsü amai bilemer. Aji oda, tajung inyaktsü bilemaka meinyaktetba kuli aika asenoki agütsütsü meranger, saka Tsüngremi tajung inyaktsü bilemer meinyaktetba kuli asenok dang nungi memeshir. Asenoki metettsüba kaji, akhi putu nung Tsüngremi ola agi jembi, saka tanü putu nungbo ola agi masü saka asenok mulung nung bilemba ajanga jembir. Aji oda, tamajung ajak moijing nungi aser tajung ajak Tsüngrem nungi asünungji, tajung inyaktsü bilembaji asenok den Tsüngremi jembir ta angatettsüla. Idangjisa asenokia temulungjang nung sarasadema Tsüngrem den jembitsüla aser Tsüngremi bilemba aser aginübaji angatettsü merangtsüla. Asenoki aiben mapa tajung inyaktsü bilemba kija jagi Tsüngremi aginüba inyaker ama bilemer. Ajisüaka, yamaji masü, iba ama bilemba jagi asenoksasa asenok ashioktsür. Temulung nung tajung inyaktsü bilemba o Tsüngremi ashi angaa inyakba na tetsüngda talangka lir. Aji oda, tajung inyaktsü bilem shia meinyakra, tajung inyaktsü bilem shia tai kaka menar asütsü. Aiben, asenoki asenok teyari nüngdakba tesem tonga moi anogo süitemdaktsür. Aiben asenoki tangar tsüngdang tajung inyaktsü kuli asür saka meinyaker.  Aji oda, tajung inyaktsü lemteter meinyakbaji Tsüngrem tsüngdang temenen, anungji Laishibaisa ashir, tajung inyaktsü nangzüker meinyakdang nungibo menangzükang tajungba. Aji oda, tajung inyaktsü bilemer meinyakba dang nungi kenyongi tajung inyaktsü tebilema mebilemang tajungba asütsü ta ashiba o ji tulu lir. Tsüngremi tashi angaba aginer ta asenok ajaki meteta lir, saka asenoki pai aginüba ama mapa agi inyaka mesayutetra, asenok Pa tsüngdang tashi angartem masü tashi mangartem akümer. Tsüngremi Pa o angar dang masü saka teinyaker kaka kümdaktsüner ta Luke tapu 6:46 nung shia angur. Aji oda, Tsüngremi tajung inyaktsü bilemba mulungjang dang masü tajung inyakba teka aser tetsüng aginer ta asenoki angateta tajung inyaktsü bilemba ama mapa agi inyaktetra, Tsüngrem nükjidongbo idangji dang atongtsü. Tanü nai tajung inyaktsü