Kohima nung ganja seret 1400 apu

Dimapur, November 28 (TYO): November 27, 2015 nü Kohima Police-i Khuzama inter-state Check Gate nung gari ka nung ganja seret 1400 bena aliba apu.
LPG Carrier (B/R No. MN-03T-1094) gariji 109 CRPF Battalion kati meiner liasü aser Khuzama inter-state check gate nung police-i temulung melemi bilemba agi gariji sot, saka LPG Carrier ji jena ao, ta Sub-Divisional Police Officer & PRO, Kohima-i sangdong ka nung metetdaktsü.
Police-i gariji arrshia aoba sülen Viswema village, Kohima anasa apu aser gari mita reprangdang ganja bena liasü. Gari driver-i police tsüngdang nangzükba ama police-i LPG bullet tanker lapoka reprangdang sen lakh 70 shi alangba ganja seret 1400 bena liasü, ta sangdong nungsa shia lir.
Ganjaji taseptsü 70 nung seret metsütsü sepbanger bena liasü aser iba dak sendakba nung LPG Carrier driver Khuraijam Denesh Singh apu. Pa ya West Imphal, Manipur kübok Kh. Kalidaman Singh’er jabaso lir ta jangjaogo aser Khuzama PS nung o ka benoker maneni bushisüngdang südar, ta Sub-Divisional Police Officer & PRO, Kohima-isa sangdong nung shia lir.