Sorkar mapa nung shimokba yimya

Nagaland state akümba temoatsü kaji state sorkar mapa nung nisung aika itteta ita sen achir. State sorkar ya mali ka asünunga, Naga nunger kechika inyaka chiyonga taküm lila ta shisabolua bilemer, kechiyong Assam küboksa alika asünungbo tang ia aliba ika yabo sorkar mapa nung meitettsü. Ajisüaka, ano külen bilembo sorkar mapa nung nüngdakba dang nungi kanga agia talila inyaker shima yur azümasen tendaktsüba agi Naga nunger kolok aser shisatsü mainer südi taka bilemer. Aji oda, koba mapa nung südir süaka tajung aser tamajung na prongla dena lir asünungji, sorkar mapa inyaktsüsa Naga nunger aika maongka anguba agi kibong aika jangratema lidagi aser ano külen state sorkar asoshibo tajangzük magütsütetba inyakertema aika alitsü. Item ajakji state sorkar leniba dak keta lir. State tenzüklibo Naga nunger tazünger mali asünungji kecha tatidang magii dang melamelaa mapai itet aser item jagi pei lima aser nübortem meima pei mapa nung kanga nendaknendaka ochishia tenzük. Ajisüaka, tanübo kibong nung tanur tasoba temang azünger aser tazünger ajak sorkar mapa bushir, anungji sorkar mapa agi matar. Iba ama mapang ka nung, state sorkar nung alirtemi tajungtem rongnunga tajungtibatem shimteta sorkar mapa nung shimoktsü melen tatidang magii pei nisung apia tejak repranga shimokba ajanga tanübo Nagaland state sorkar mapai aibaji mapa inyaktsü shimer masü saka angati ita sen achitsü shimer amai kümogo. Ano, iba dang nung jagi tamajungba kaji sorkar nung ketdangser tulurtemi pei department nung adokba mapa sen yong ayokba sobaliba ya asütsü. Iba jagi state nung teraksa tulu adokogo. Aji oda, sorkar mapai sen agi alia aibaji tanur tasodangyongi meshitak sotetba amai lir. Iba nisung jagi sorkar mapa nung inyakba mezüng anogo nungi ochimashi mapa inyak tenzüktsü, kechiyong iba jagi dang pa mapa aliba sento menoktsü. Tanü Nagaland nung iba amaji atalokba ajanga center nungi sen teimba yokli state tera timtatemba ta küma aoba angur. Joko, Nagaland state kübok department ajak nung inyakyim ya tetenzük nungi memelenshitetra state ya anentsüsa mapang agia tonga arutsü. Nagaland state sorkar mapa inyakertem aika süaka mapaa maka aser ita sen agütsütsüa maka ta yakta kümadoktsüba jenjang ka nung lir. Iba ama tia kati asenok maitsü atema tang yongi state sorkari ozüng takang ka yanglua sorkar mapa nung inyaktsü asoshi shimba yimya ya latetshitsüla. Tangbo, tanga office mapatem nung inyaktsü asoshi kecha tatidang magii shimba purtemji khen yutsür, police-tem kecha tatidanga magi ser shimtetba ya tesüngmangtsüka lir. Sepai mapa nung anioktsü asoshibo tashishitsü aika lir, iba jagi jungjunga tendanger dang shimer. Iba jagi tatidang magi shimtetba Nagaland police aika peisasa pei mazüoktet aliba angur aser angashir. Ano, alima aser nübortem asoshi taküm bendanga agütsütsü asoshi telemtetba tulu agir sepai nung ai, saka taidangyongi sen agi mapaji alir ira, iba nisungba jagi police küm mekümka ochimashi inyak tenzüktsü. itemji parnoksasa raksaba masü saka asenok tsüraburtem o tulurtem na jembir raksatsür amato akümer. Sen agi alia police akümba mitkar ka nungi asenoki kechi imlatsü. Item asoshi pei lima aser nübortem taküm aser rongsen kümzüka inyaktsübaji tilaba saka pa mesüra la sentsüh aotsübajiang tama aser tongtibangba asütsü. Iba ama tenzükba agi asen lima temeimtsüka kümdagi. Tatidang magi shimertem tulurtem aika mapa makok timtemba angur aser tilartem aika mapa memetet timtemba angur. Item ajakji state aser nübortem takoksa lir. Ibaji sorkar nung alirtem majungba aser merajemba agi asütsü. Joko, tangbo asenoka tain akümer asünungji, state sorkar mapa nung inyaker shitakba kwi nüngdaker, itemji dang jungjunga tatidang agir shimtsüla aser tanüngba purtem dang business mapa tapu balala inyaktsü sayua yaritsüla.