West Indies spinner Sunil Narine ball aonba nungi anendaktsüogo

Dubai, November 29 (Agencies): Alima nung baller tajungtiba, West Indies cricket team nungi spin ball aoner, Sunil Narine-i ball aondang asayai memelaba yimya benshia aonba ajanga international asaya nung ball aonba nungi anendaktsüogo.
International Cricket Council (ICC)-i, pa ball aonba asadangdang pa teka, lateta aliba ’15 degrees’ dak alia mesanga oa aonba putetba sülen iba telemtetba agi, ta Deobarnü sangdong ka ajanga metetdaktsü.
Tang nungi tenzüka pa ball mondaktsütsü ajisüaka pai ball aonba yimya melenshira tanaben asadangtsü maongka agütsütsü aser lateta aliba ama onra international asaya nung ondaktsütsü, ta sangdong ajanga ashi.
Arishi küm 27 tain, Narine ya tang bowler rongnung, over 50 aser 20 asaya nung ICC ranking temaba jenjang nung lir.
Pa ball aonba yimya ya küm ka dak tema masaya arur tan ita Sri Lanka den ODI series asayadang ICC nem metetdaktsü.