Iraq dak IS anema raratsü tashi lir: Abadi

Baghdad, November 30 (Agencies): Tang Syria aser Iraq na nung lendong kanga sashia atalokdaktsüba kiralongrar telok, Islamic State (IS) anema raratsüsa Iraq indang mitkartem peria aliba olen ka Iraq Ato Kilonser, Haider al-Abadi-i tanü Hombar nü metetdaktsüogo.

Iraq-i US mitkartem tali yokshitsü asoshi US Senator-temi onük benokba sülen Abadi-i tanü iba olenji sangoktsü.

“Alima tashi abenba linüktemi tongpang nung amshitsü osettsüset aser tongpang raratsü tesayuba agütsüba atema pelar. Ajisüaka, IS telok anema tongpang raratsü asoshi ozü mitkar züngsem peria lir,” ta pai ashi.

Paisa ashiba agi, par Iraq-i IS densema, kiralongrar telok ajunga meshimeshia samatsütsü terenemshiba agia lir.

Tang Iraq-i yoka aliba US mitkar züngsem 3,550 den yariteptsü asoshi par US mitkar züngsem 10,000 shi Iraq-i yoktsü asoshi US Senator ana, John McCain aser Lindsey Graham nati yashi Deobar nü onük benokba osanga jangjaogo.