Christian & Muslim nisungtem adianu lir: Pope Francis

Bangui, November 30 (Agencies): Alima ajunga nung Catholic tamangba yimsü lenisang, Pope Francis-i Africa kübok densemba linük 3 tashi semdanga senzüba sülen par Vatican bushia tanü Hombar nü shilangogo.

Francis-i Bangui yimtiba kübok national stadium nung Mass sentong tanü ania agiba sülen Central African Republic (CAR) tanü toktsüba osang jangjaogo.

Francis-i Vatican bushia aoba jakdang Bangui nungsa tentetba tongti mosque semdanga Christian aser Muslim nisungtem aidanu lir ta lemsatepa liasü.

“Christian aser Muslim nisungtem ya adianu lir. Anungji, asenok ajaki ka küma lungjemer tamangba yimsü aser Tsüngrem tenüng nung ajemdaker lendongtsüngdong atalokdakja tongpang rarabaren anentsüla,” ta pai ajungshia ashi.

Muslim nisungtem den ajurutepba ajanga dang pai tan Christian aser Muslim telok ana tsüngda mangatettep adoka tongpang kanga sashia raraba linük, CAR semdangdangbaren tajangzük alitsü ta tangatetba yur, Francis-i tanü tongti mosque-ji semdanga liasü.

Tang CAR nung tongpang raraba telok ajungai tongpang rarabaren anena par linük nung yimji yimjung lidaktsütsü atema nungdakba maparen inyaktsü tajungshiba olen ka Francis-i yashi, Deobar nüa lemsatepba osang jangjaogo.

“Tongpang amshitsü osettsüset agi masü saka ochiashi, temeim aser taochi yimyatem amshia CAR linük nung yimtenren jenjang tajungba kümdaktsütsü ayongzüker,” ta Francis-i yashi Bangui Cathedral nung onük jembidang sangoktsü.

“Tan Francis-i CAR semdangba ajanga ozü CAR nung telungjem aser yimji yimjung tia bener arutsütsü imlar,” ta CAR Tir, Catherine Samba-Panza-ia metetdakja liasü.

Sorkar anemer Muslim telok, Seleka-i Francois Bozize CAR Tir menden nungi tashiyim agi 2013 küm March ita atsüngdokba sülen CAR tensa kanga mejungi aliba osang bushiteta lir.