SP lenir Azam Khan-i RSS lenirtem anema jembi

Lucknow, November 30 (Agencies): Samajwadi Party (SP) lenir aser Uttar Pradesh Minister, Azam Khan-i tebur o tebur na shi nung medemba olen ka jembiba ajanga mangatettep onük tasen ka adokogo.

‘Nai Dunia’ osang ka ajanga ashiba agi, o tululu jembir SP lenir aser Minister, Azam-i tebur o tebur na shi nung medemba onük nung jembidang pai, Rashtriya Swayamsevak Sangh (RSS) züngsemtem ya yamaji (tebur o tebur shi nung medemba) lir, ta ashi.

Pai jembiba oji metenja Azam Khan-i, ”iba kuli ajanga RSS züngsemtemi kibong makümer,” ta ashi.

Ajisüaka Azam-i jembiba oji RSS-i kanga sashia ashishiogo aser parnoki, SP lenirji tekolok meshitaki akumer, ta aitsüogo.

Vishva Hindu Parishad (VHP)-ia Azam-i jembiba oji kanga ashishiogo.

Taoba Honibar nü Union Finance Minister Arun Jaitley-i, “Kasa o kasa na (tetsür o tetsür na aser tebur o tebur na) shi nung medemba ya Supreme Court-i reprangshitsüla (melatsü atema),” ta jembiba sülen Azam-i item o jembiogo.

November 28, 2015 nü Times LitFest sentong nung jembidang Arun Jaitley-i, “Supreme Court-i 2014 obendang ajanga kasa o kasa na shi nung medemba nokdangba ya tang temelenshiba tensa ‘legal jurisprudence’ ama masü, anungji court-i iba ya tanaben reprangshitsüla,” ta ashi.

Jaitley-isa, India nüjiso anguba sülen linük nung judicial system tashimait liasü, kechiyong sorkartemi tashi kanga alia amshi. Ajisüaka landmark rulings aikati sorkar tashiji ashishia liasü, ta jembia liasü.