Nagaland Angh PB Acharya-i Statehood Day salem abener

Dimapur, Nov. 30 (TYO): Nagaland Angh, PB Acharya-i sangdong ka ajanga 52 buba Statehood Day nüngtem nung Nagaland nung alir ajak den tepela salem osang metetdaktsüogo.
December mezüng anogo ya Nagaland yimten puti otsü nung kanga dang tongtibang anogo ka lir kechiyong 1963 küm iba anogo nung Nagaland India kübok state 16 buba aküm. Iba anogo nung Naga nungertemi aginüba ka tongtet aser tarutsü tia yanglutsü atema tebilemtsü khuret ka benlok, ta Angh PB Acharya-i sangdong nung shia lir.
State jenjang anguba ajanga Nagaland nung alirtem maitsü tejangjaba kümdaktsü aser pei lima renloktsü atema maongka aika angu. Asen state anguba nüngtem nung asenoki Hornbill Festival amunger aser iba mapang asen sobaliba wazüka ayutsü bangjemteper, ta Acharya-isa ashi.
Paisa ashiba agi, küm aika asenok kanga nüma tanga asen takar sobaliba sayua aruogo aser tang asenoki Medicine, Engineering, Law & Business amala nung tajungba akümtsü merangtsüla. Asen lanurtemi Nagaland renlokdaktsütsü aser azükaru lidaktsütsü atema mapa inyaker aser tesüiba küm 51 tashi Nagaland-i maparen balala nung terenlok nguogo.
Asenok aluyimba lokti ka lir aser aseni tsünütetba yokdoktsü atema shishilembadak tajung alitsü nüngdaker aser ibaji ajanga aluyimertem tajangzük angutsü. Nagaland nung tangar memenepba district tem Mon, Tuensang, Kiphire aser Longleng asoshi asenoki temulung tali agütsütsüla, ta Angh-isa ashi.
Asenoki Nagaland Swachh/Temerük Nagaland kümdaktsüdi aser Jan Dhan Yojana kübok teyari nüngdakbapur ajak bank Account holder kümdaktsüdi.
Sensakertem tarutsü atema ita nung Re.l Central Insurance Project ya sensaker ajak ket atongtsü atema asenoki mapa inyakdi. Asenoki asen Government School tem tashi itdaktsüdi kechiyong item school nung sensaker kaketshir meyirjang aika kaket shisatsü angur, ta Aharya-isa metetdaktsü.
Iba anogomung nung Nagaland state yangerteter, asen akhümket lennirtem bilemteter. Iba state tetenzükertemi mangdang ayuba tongtetdaktsütsü atema asenoki asalentong yanglua inyaktsüla, ta paisa shisem.
“Nagaland nung aliba nübortem yimjung nung aser azükarua alitsü atema ni moatsür. Tanü asenoki yimjung aser terenlok atema telongjem nüngdaker. Küm aika Nagaland nug alirtemi yimjung aginüa arur aser yimjung ali nungdang asen state aintsü aser terenlok alitsü,” ta Angh-ia ashi.
India Prime Minister Narendra Modi lenisüba kübok India sorkar aser NSCN (IM) tsüngda August 3, 2015 nü otsüsütsü aketba framework agreement agiogo. Asenok tsüngda kati ka akhümtsübutepra, mulung lemtetra aser tamang katetra aseni aginüba tongtettsü ta iba tenangzüktep ajanga asenok dang tatishitsü sayur, ta Acharya-isa metetdaktsü.
Tanü iba anogomung nung ni Naga nunger yimten telok ajak dang yimjung olemtep nung adentsü aser Naga yimten tebilemtsü atema telemtetba ka agitsü mepishir, ta paisa ayongzük.